Asturies súmase a les comunidaes na que la mázcara ye obligatoria

Esta selmana, a más tardar el miércoles, Asturies va facer obligatoriu l’usu de la mázcara n’espacios públicos en tou momentu, magar se pueda caltener la distancia de seguranza interpersonal, siguiendo’l camín qu’entamó Catalunya. El presidente Adrián Barbón amuesa’l so esmolecimientu pola “relaxación qu’apreciamos”.

El llavianés tornó a emplegar ayeri la rede social Twitter pa comunicar esta decisión que venía cavilando nos tiempos últimos. “Quiero facevos una anuncia importante. Esta mesma semana, el Gobiernu del Principáu d’Asturies aprobará l’usu obligatoriu de la mázcara, con independencia de que se pueda caltener la distancia de seguranza. Llevamos díes trabayando la norma xurídica que lo fadrá posible”, escribió.

Catalunya, mui afeutada por un biltu en Lleida, foi la primera en tomar esta decisión, norma qu’entró en vigor el xueves. Illes Balears y Estremaúra foron les siguientes en facer obligatoria la mázcara, dende güei, y son otres munches les que se van siguir el mesmu camín.

N’Asturies esti pasu va dase enantes del miércoles. Barbón va convocar un Conseyu de Gobiernu estraordinariu mañana o pasao nel que se va aprobar la midida.

“En tou esti tiempu, demostramos que’l Gobiernu d’Asturias adopta les decisiones que considera más afayadices pa protexer a la nuesa ciudadanía, anteponiendo la salú pública a cualquier otra consideración. Y asina lo vamos siguir faciendo tou’l tiempu que dure la crisis”, finó Barbón, que cree que “énte la relaxación qu’apreciamos con esmolecimientu, creemos dende’l Gobiernu del Principáu que ye necesariu dar un pasu más” imponiendo esta midida.

Na semeya, Barbón lleva una mázcara cola bandera asturiana nun espaciu públicu.