Dixebra presenta la lletra del cantar que da nome al discu: 'Ente la niebla'
|
12 Xunu, 2020 por Redacción
- Inicie sesión o rexístrese pa espublizar comentarios
"Ye un resume afechiscu d'una obra de calter conceptual y mui ambiciosa", afirma la banda.
Dixebra ta acabante de presentar la lletra del cantar que va dar nome al discu que verá la lluz, si nun hai biltos nuevos de COVID-19 que pudieran frenar el procesu de grabación y edición, "a final d'añu", confirma a Asturies.com el cantante Xune Elipe. Trátase de 'Ente la niebla' y comprende l'espíritu d'un discu nel que "queremos contar/cantar esa otra historia que nun apaez nos llibros de testu y qu'incomoda al establishment del nuestru país: la llucha y la resistencia de la clas obrera asturiana".
Del tema yá conocíemos l'estribillu, pero la banda adelanta agora la lletra completa a la espera de retomar los ensayos:
'Ente la niebla'
Quiximos ser un recortable,
una postal, una silueta.
Munchos cantares, munchu poeta,
fuimos un póster de resistencia.
Siguimos vivos y amenazantes,
del movimientu queda la inercia.
Entá pensamos que damos mieu,
como'l Cid, muertu sobre Babieca.
Ente la niebla,
una solombra, ente la niebla.
Ente la niebla,
como'l Guadiana, la clas obrera.
La dinamita del 34,
los enllaces de la guerrilla.
Les Comisiones de La Camocha,
años de cárcel y de destierru.
Candil encesu de La Fuelgona,
los despidíos y l'amnistía.
L'optimismu del astilleru,
les marches negres y les de fierro.
Ente la niebla,
una solombra, ente la niebla.
Ente la niebla,
como'l Guadiana, la clas obrera.
Ente la niebla,
una solombra, ente la niebla.
Ente la niebla,
entá respira la clas obrera.
Na semeya, un ensayu de Dixebra centráu nos cantares del discu nuevu que tuvo llugar n'avientu.
Efrén d'Andrés
