“‘Ente la niebla’ ye un álbum conceptual sobre la historia de la clase obrera asturiana”, rellata Elipe

Dixebra tien compuestos 20 cantares pal so discu nuevu, que va llevar el nome de ‘Ente la niebla’, de los que ente 14 y 17 van tar presentes nel trabayu. “Ye un álbum conceptual sobre la historia de la clase obrera asturiana”, esplica'l cantante Xune Elipe, una apuesta de la banda que s'alloña de la tendencia actual na industria.

“La tónica xeneral agora ye asoleyar temes sueltos. Nós decidímonos por facer un álbum llargu, mui ambiciosu, de calter conceptual alredor de la nuesa historia; sobre qué fixo, qué foi y qué ye la clase obrera tomando como referencia’l sieglu últimu, ente’l 1920 y 2020, añu nel que va asoleyase”, añade’l de Villalegre. Anguaño la banda ta trabayando nos arreglos de los cantares y na preproducción de los mesmos.

El nome del discu, el décimu d’estudiu y decimocuartu del grupu, ye ‘Ente la niebla’, títulu tamién d’un de los cortes. “Ente la niebla, una solombra, ente la niebla. Ente la niebla, como’l Guadiana, la clase obrera”, diz l’estribillu d’esti cantar.

Xunto a él otres pieces que falen de la historia del movimientu obreru asturianu, “dende cuando s’empieza a autoorganizar, a ser protagonista del so propiu destín; dende les primeres grandes fuelgues, el cambiu d’una sociedá agraria a la industrial, a anguaño”. Asina, episodios como la Revolución d’Ochobre del 34, l’esiliu, los fugaos, la Transición o la llucha del Naval van tar presentes en ‘Ente la niebla’.

L’álbum va contar con un formatu probablemente de discu-llibru, nel que los siguidores de la banda van atopar lliteratura, cómic y historia. Nun hai fecha entovía pal so asoleyamientu, pero va ser esti añu cuando salga a la venta.

Entrada de Sergio Álvarez

Otra novedá nesti discu de Dixebra va ser Sergio Álvarez, batería nuevu, que sustitúi a Jorge Cambareli. “Yera un puestu difícil de cubrir y Jorge Cambareli llevaba 15 años nel grupu siendo una parte fundamental nos discos y nos direutos sobre manera. Creo qu’acertamos cola incorporación de Sergio Álvarez, que s’acopló mui bien a la banda dende’l minutu 0 nun momentu de composición que ye mui intensu”, rellata Elipe.

Na semeya, grabando les maquetes previes pa la preproducción de los temes.