Dixebra da los últimos retoques en Chanos a ‘Ente la niebla’ enantes d’entrar a grabar en Corvera

El set de grabación del guitarrista Primi Abella na población ḷḷeniza de Chanos ta siendo’l centru d’operaciones de Dixebra pa preparar les maquetes previes enantes d’entrar a grabar a la vuelta del branu en Corvera. ‘Ente la niebla’ ye’l títulu d’un discu-llibru conceptual que xira alredor de la memoria histórica de la clas obrera asturiana.

Xunto col cantante Xune Elipe, Abella ta trabayando estos díes la parte vocal del álbum, el decimoséptimu de la banda nos sos más de 30 años de vida. Son los retoques últimos enantes d’entamar col procesu de grabación nos Tutu Estudios, baxo la producción de Sergio Rodríguez, cola previsión de que l’esperáu proyeutu nuevu vea la lluz esti mesmu añu.

'Ente la niebla’ ye un discu conceptual que trata temáticamente “la historia del pueblu asturianu del últimu sieglu, esto ye, dende la industrialización del país y el surdimientu d'una clas proletaria asturiana”, esplica la banda. Asina, al travié de les lletres van tratase asuntos como “la toma de conciencia política, les primeres lluches obreres, l'autoorganización, la emigración, la Revolución d'Ochobre, la guerra contra'l fascismu, la represión, l'exiliu, los fugaos, la fuelgona del 62, el paternalismu franquista, la transición, la reconversión industrial, les movilizaciones del naval, la llucha de les muyeres d'IKE, la mafia sindical, el desencantu o les movilizaciones actuales”.

Con formatu de discu-llibru, la parte musical va tar acompañada de testos de periodistes, escritores, profesores, historiadores, ilustradores o dibuxantes que reflexonen “sobre'l pasáu, el presente y el futuru de la clas obrera asturiana. Y ye que la evolución histórica de les clases populares y trabayadores d'esti país son parte fundamental de la nuestra idiosincrasia como pueblu y una seña d'identidá con una potenciacomo poques”.

Chanos, mui presente

Chanos, pueblu del que ye orixinariu Abella y que centra estos díes l’actividá de la banda, tamién va tar presente nel trabayu al traviés de socedíos, paisaxes y personaxes del llugar. Nellos básense dellos de los testos de ‘Ente la niebla’.

Na semeya, Elipe y Abella.