Dixebra cumple 35 años con dellos proyeutos en marcha y el discu-llibru ‘Ente la niebla’ previstu pa lo último de febreru

El 6 de xineru del 1987 a les 16 hores un grupu de rapazos quedó pa ensayar nunes cocheres de Castañeda, en Corvera, y facer un grupu de rock n’asturianu. Echaba andar asina Dixebra, que 35 años depués celebra esta fecha con dellos proyeutos en marcha, como una xira o una esposición, y da les últimes formes a ‘Ente la niebla’.

“Lo que más recuerdo d’aquel día ye la inconsciencia típica de la mocedá d’unos rapazos que se xuntaron pa pasalo bien aquella tarde y facer un poco de música. Pero naquellos primeros ensayos dalgo vimos pa llegar a establecenos y facer dalgo nuevu nun momentu nel que la música n’asturianu taba centrada nel folk y na canción d’autor”, espresa Xune Elipe, cantante de Dixebra.

La banda avilesina cumple 35 años esti 2022 y va celebrar esti aniversariu cola espublización del discu-llibru nel que lleven trabayando dende enantes del andanciu, retrasáu polos efeutos de la situación sanitaria, y dellos proyeutos como una esposición, un documental o un llibru sobre’l contestu nel que nació Dixebra. Una bayurosa collecha, provocada en parte precisamente pola pandemia, que va facer mui especial esta fecha señalada.

El primer avance ye’l logu especial que va acompañar tol material gráficu de trentenu quintu aniversariu. “El so autor ye Eduardo Carruébano, que yá nos fixo’l del trenta. Él entiende mui bien la estética y la filosofía de Dixebra. Trátase d’un logu mui visual”, apunta Elipe.

Nel mesmu rescampla un rayu nuna ‘D’, “que representa la fuercia y el dinamismu que queremos tresmitir nos nuesos cantares. Ye una descarga física y tamién mental, porque les nueses lletres busquen facete pensar, ximielgate y replantegate coses”.

Conciertos en Corvera y Bimenes

Ensin querer, pol retrasu acumuláu daes les circunstancies vivíes, la estrella del aniversariu va ser ‘Ente la niebla’, el discu-llibru conceptual con venti cantares alredor de la memoria histórica de la clas obrera asturiana. “La selmana próxima entamamos cola mezcla”, apunta Elipe, que cuenta con “que tea distribuyíu a lo último de febreru”, yá que la parte escrita, 120 páxines con testos de periodistes, escritores, profesores, historiadores, ilustradores o dibuxantes, yá ta pa dir pa imprenta.

“Ye un trabayu mui pensáu, mui trabayáu”, asegura’l cantante. “Ye’l Dixebra de siempre, pero un pasu más allá”, añade.

Asina, presenta cantares “con un tratamientu vocal como nunca”, y numberoses collaboraciones que dan presencia a instrumentos como mandolines, el bouzouki o’l violín. Y estilos mui pensaos según la temática tratada, como una danza tradicional pa falar de los fugaos, un tema punk –‘Caballu de Troya’– pa tratar de la repercusión de la heroína na mocedá nos años de la reconversión industrial o una balada “mui señordosa” –‘Sola’– pa musicar la cayida del Frente Norte na Guerra Civil y la creación del Conseyu Soberanu d’Asturies y Lleón.

Munchos d’estos temes van poder sentise na xira que va entamar Dixebra esti añu, con conciertos yá confirmaos en Corvera, pa la Nueche de San Xuan, y en Bimenes, pa la Fiesta de la Oficialidá. Tán abiertos contautos pa tocar n’An Oriant con motivu del Festival Interceltique de Lorient, que celebra l’Añu d’Asturies, asina como n’otros llugares de dientro y fuera d’Asturies, como Galicia, Cantabria y Euskadi.

Tamién ta previsto un conciertu especial pol 35 aniversariu, que podría celebrase en Xixón énte la falta d’interés d’Avilés por acoyelu. “Ye un menospreciu que nun s’entiende”, apunta Elipe.

Otres iniciatives

Xixón sí ta yá confirmáu p’acoyer una esposición en mayu, coincidiendo cola Selmana de les Lletres Asturianes, pero trescendiendo a esa fecha. “Nun queremos que xire alredor de Dixebra, sinón que sía una disculpa pa falar del universu al so alredor, como la lliteratura n’asturianu o la historia de la música asturiana”, esplica.

Completen los proyeutos pa esti 2022 un documental sobre la banda que prepara Goxe Producciones y el llibru ‘Da-yos caña. El tiempu y el contestu d’una banda de rock astur’, nel que lleva tiempu trabayando Elipe, cola previsión de que vea la lluz pa la seronda. “Tien una filosofía asemeyada a la esposición y pretende contar la historia que vio nacer a Dixebra”, rellata.

Otra manera, l’Archivu de la Música Contemporánea Asturiana (AMCA) va incorporar la dixitalización de la primer maqueta de Dixebra. Ye un conciertu del añu 1987 en Turón, un documentu históricu nel que poder sentir temes nunca grabaos como ‘Yann el bretón’ o los samplers ente temes que la banda yá incorporó dende un primer momentu.