Dixebra, Corquiéu, Rodrigo Cuevas y Stormy Mondays van actuar en San Mateo

|
Dixebra, Corquiéu, Rodrigo Cuevas y Stormy Mondays van actuar en San Mateo

Les fiestes de San Mateo van dar comienzu’l vienres 15 y van allargase hasta’l domingu 24, siendo’l día grande’l xueves 21. Dixebra, Corquiéu, Rodrigo Cuevas, Stormy Mondays y Igor Paskual van actuar na plaza la Catedral d’Uviéu, onde tamién van llevar la so música Fangoria, La Oreja de Van Gogh o The Christians.

Toles xornaes va haber trés conciertos, na mayor de les veces d’estilos mui estremaos, nesti llugar, con comienzu a les 21, 23 y 1 hores, cola esceición única del miércoles 20, por motivu de la viéspora de San Mateo, cuando van adelantase una hora. Amás de los de la Catedral, tamién va haber actuaciones na plaza de Feijoo (XX Concursu de Rock Ciudá d’Uviéu Alejandro Blanco ‘Espina’, 22.30 hores) y na del Paragües (23 hores).

San Mateo ye’l llugar escoyíu por Dixebra pa dar el conciertu especial del so trenta aniversariu n’Asturies, que va ser asemeyáu al que protagonizó’l pasáu día 8 nel Festival Interceltique de Lorient, coles collaboraciones de los hermanos Tejedor, Rubén Bada y Toño Gómez. La intención de la banda ye grabalu pa la ellaboración d’un documental que cuente la historia de los últimos trenta años d’Asturies al traviés de los cantares del grupu referente del rock n’asturianu. Banda Third Floor y l’ex El Canto del Loco, David Otero, van preceder a Dixebra nesa xornada nel escenariu.

Pela so parte, Corquiéu van encargase d’abrir los conciertos de San Mateo’l vienres 15, cita na que van participar tamién La Oreja de Van Gogh y Green Valley. Pal sábadu tán previstes les actuaciones de los gallegos SonDeSeu xunto con Xuacu Amieva, Gemeliers, y Beret y Nikone, y pal llunes 18 Igor Paskual, M Clan, y Carlos Jean y Albert Neve.

Sweet Soul Music Revue, Fuel Fandango y cuatro grupos de música cubana van tocar el martes 19, mentes que’l miércoles 20 va ser el turnu de Pioneros, Chambao y Gispsy Kings. Pal xueves 21 van xubise al escenariu Rodrigo Cuevas, Carlos Marco y Fangoria, y el vienres 22 Stormy Mondays, Sweet California y La Pegatina.

Los dos conciertos caberos de San Mateo na plaza la Catedral van protagonizalos Stacey Kent, The Christians, y Tom Swoon y Luka Karo, el sábadu 23, y la final del FestiAMAS, el domingu 24.

Otres actuaciones

Na programación musical de San Mateo tamién destaquen les actuaciones a de Fe de Ratas el sábadu 23 na final del concursu de rock, o la de Cerezal (vienres 15) y Manolo Peñayos (sábadu 23) na plaza’l Paragües.

Contador Estadistiques