El conciertu especial de Dixebra pol 30 aniversariu va tener llugar en San Mateo

|
Dixebra

La fecha pal conciertu especial de Dixebra pol so trentenu aniversariu yá ta zarrada: el domingu 17 de setiembre n’Uviéu dientro de les fiestes de San Mateo. Ésti va ser una réplica al que va protagonizar la banda, que toca esti xueves nel Sol Celta d’Avilés nun formatu de proximidá col públicu, n'agostu nel Festival Interceltique de Lorient.

L’Espace Marine, escenariu principal del mayor certame celta del mundu, va acoyer l’actuación de Dixebra’l 8 d’agostu nuna cita na que The BackYard Devils (Acadie) van encargase de caldiar l’ambiente. La banda avilesina reforzaráse pa esti eventu colos hermanos Tejedor (gaita y acordión), Toño Gómez (trombón), Rubén Bada (bouzouki y violín) y Vito Álvarez (coros), a lo qu’hai que sumar la participación estelar en dos o trés cantares de la Bagad de Lorient.

“N’Uviéu queremos facer una réplica del conciertu del Interceltique”, esplica Xune Elipe, cantante del grupu, cola única esceición de la presencia de la banda de gaites bretona al ser un volume importante de músicos que desplazar. El conciertu va ser grabáu, pero non pa edítalo en DVD o CD, como’l d’Avilés de los venti años, “sinón cola intención de que les imáxenes sirvan pa facer un documental que cuente la historia de los últimos trenta años d’Asturies al traviés de les nueses canciones”, apunta.

Sol Celta y otres feches

Dixebra va actuar esta nueche, a les 22 hores, na cai del Sol dientro de la programación del VI Sol Celta, qu’enantes entama les actuaciones de Pandereteres (20.30 hores, cai Alfonso VI) y L’Aldu (21 hores, plaza Carlos Lobo). Ésti tamién va ser un conciertu especial pa la banda, yá que va presentar un formatu diferente, faciendo “alcordanza de los sos primeros pasos, cuando tocaben nos pequeños locales qu'a finales de los 80 y primeros de los 90 programaben actuaciones en directo  na ciudá avilesina”, esplica’l grupu nuna nota de prensa.

“El conciertu d'esti xueves quier recordar esi tipu de conciertos, cuando la proximidá col públicu produz una mayor comunicación y interacción colos músicos, dalgo que Dixebra nun escaeció en tou esti tiempu de vida”, añaden. La siguiente cita de los avilesinos va ser el día 27 nel xixonés Festival Arcu Atlánticu, pa depués siguir con actuaciones nel Sauga Folk (5 d’agostu en Cantabria, con Garma y Gwendal), l’Interceltique de Lorient, Carabanzo (19 d’agostu, con Spanta la Xente), Noite Celta de Porcía (26 d’agostu), A Algarabía (2 de setiembre en Galicia) y la Nueche Celta de Carrio (8 de setiembre).

Mentes, pa la seronda, la banda ta buscando feches pa tocar fuera del país en sales, con posibilidaes en Madrid y Euskadi, ente otros llugares.

Contador Estadistiques