Dixebra adelanta 'Soi', segundu cenciellu de 'Ente la niebla'

El día 22 va salir a la venta'l llibru-CD de la banda, que va presentar en mayu n'Uviéu.

Depués de poder sentir 'Ente la niebla', cantar que da tamién nome al últimu trabayu de Dixebra, los avilesinos presenten agora 'Soi', un tema rockeru. "Somos nós y les nuestres circunstancies, el productu del tiempu que nos tocó vivir y del que-yos tocó a los y les que nos precedieron. Ensin el carbón de los valles nun seríemos lo que somos, ensin la emigración, ensin les épiques del movimientu obreru. La recuperación de la memoria histórica vien a recordanos que tolo que tenemos y de lo que disfrutamos –la lluz, la niebla y la escuridá– son lo que la llucha de contrarios, los nuestros éxitos y fracasos y les propies contradicciones fixeron de nós", espliquen.

La xente interesao en facese con esti ambiciosu trabayu basáu na historia del movimientu obreru asturianu yá pue acutalu a 25 euros na web de Musicasturiana pa recibilu en casa'l mesmu día 23, con delles promociones pa mercalu xunto con material del grupu a un preciu rebaxáu. Pa poder sentir los temes en direuto va haber qu'esperar hasta'l 6 de mayu, Día de les Lletres Asturianes, cuando Dixebra va presentar el discu na sala Tribeca Live d'Uviéu.

Les entraes yá tán disponible a 12 euros en L'Esperteyu (Uviéu), Trisquel (Xixón) y El Cafetón (Avilés). Na puerta van costar 15 euros.