Dixebra asoleyen trabayu nuevu n’abril

‘Ente la niebla’ axunta collaboraciones musicales, lliteraries y artístiques.

Yá pue sentise nes plataformes dixitales un adelantu d’Ente la niebla, pero’l discu-llibru de Dixebra va salir a la venta en formatu físicu’l 22 d’abril. Vuelven a l’actualidá discográfica cola so obra más ambiciosa y personal. Ye la manera de celebrar los 35 años de carrera d’esta banda qu’axunta soníos punk, folk, funk o ska.

El CD ye la escusa pa que ‘Ente la niebla’ axunte nun llibru lliteratura, ilustraciones y fotografía histórica. En 20 cantares Dixebra percuerre de manera cronolóxica la historia de la clas obrera asturiana en temes que falen de la llucha obrera, la resistencia antifascista, la represión franquista, l’exiliu, los fugaos, la emigración o les movilizaciones populares. Nel trabayu, collaboren periodistes, escritores, profesores, historiadores, ilustradores, dibuxantes… que reflexonen sobre’l pasáu, el presente y el futuru de la clas obrera asturiana.

Nes 118 páxines que conformen el llibru, hai testos y ilustraciones de Rubén Vega, Pablo Texón, Marta Mori, Rafa R. Valdés, Irene Faza, Faustino Zapico, Miguel Solís, Penélope Miranda, Alfonso Zapico, o Nieves González, ente otros. Amás, pela parte musical participen Toño Gómez (trombón), Rubén Bada (violín), José Manuel Tejedor (gaita), Javier Tejedor (acordión), Lluci Palomares (voz) o Bárbara González-Quevedo (voz). ‘Ente la niebla’ yá se pue acutar en preventa.

Conciertu de presentación

El vienres 6 de mayu, Día de les Lletres Asturianes, a les 20:30 hores, Dixebra van actuar na sala Tribeca d’Uviéu pa presentar ‘Ente la niebla’ en directo. Les entraes físiques yá tán a la venta. A esti conciertu van siguir otros nueve yá confirmaos, tanto dientro como fuera d’Asturies, que la banda va dir anunciando.