Yá ta la venta 'Ente la niebla' de Dixebra

|
Cubierta de 'Ente la niebla' de Dixebra

La banda va presentar esti discu-llibru conceptual sobre la historia de la clase obrera asturiana en direuto'l día 6 de mayu n'Uviéu.

'Ente la niebla', el trabayu últimu de Dixebra, yá ta a la venta. Un CD con 20 cantares acompañáu d'una obra de 112 páxines con collaboraciones musicales y lliteraries componen esta ambiciosa obra.

Nel primer apartáu apaecen nomes como Toño Gómez (trombón), Rubén Bada (violín), José Manuel Tejedor (gaita), Sandra Lusquiños (voz), Pablo Sánchez (coros), Javier Tejedor (acordión), Lluci Palomares (voz) o Bárbara González-Quevedo (voz), mentes que nel segundu esta obra cuenta coles firmes de istoriadores como Rubén Vega, Faustino Zapico o Rafa R. Valdés, l’arqueóloga Irene Faza Aladro, los escritores Pablo Texón, Xosé Miguel Suárez y Marta Mori o l’activista llinguística Penélope Miranda.

L’aspectu gráficu tamién ta cuidáu al detalle, con más de venti ilustraciones esclusives feches polos destacaos dibuxantes asturianos Miguel SolísSantos, Alfonso Zapico, Nieves González y Ruma Barbero, qu’aporten a caúna de les canciones la so visión particular dende’l puntu de vista estéticu. A ello hai qu’añader la cincuentena de fotografíes históriques de toles époques nes que se desarrollen les histories de cada cantar.

Esti "exerciciu de memoria colectiva sobre la evolución histórica de les clases populares y trabayadores asturianes" y "reflexón sobre’l pasáu, el presente y el futuru del pueblu asturianu" va presentase en direuto'l vienres 6 de mayu na uvieína Sala Tribeca. Les entraes yá tán tamián a la venta en L'Esperteyu (Uviéu), Trisquel (Xixón) y El Cafetón (Avilés) a un preciu de 12 euros, mentes que na puerta van tar a 15.

Contador Estadistiques