Daniel García de la Cuesta presenta un discu de bandurria

"Cantares de Bandurria" ye'l títulu del nuevu CD qu'esta mesma selmana va entamar a distribuyise per toa Asturies y nel que s'espeya'l resultáu del trabayu d'investigación del músicu Daniel García de la Cuesta (Lliberdón, Merlín) sobre esti instrumentu.

El CD preséntase amás como complementu musical al llibru "La bandurria y el rabel" iguando dambes partes un importante trabayu de recuperación y tresmisión del usu tradicional del instrumentu n'Asturies, ya que l'últimu bandurrieru tradicional morrió a mediaos de la década de los 90. El discu tien 31 cortes, de los que 17 son melodíes y cantares tradicionales del repertoriu del instrumentu interpretaos pol mesmu Daniel García, amestándo-yos dalguna pieza de composición propia. D'otra manera, el CD presenta tamién parte de les grabaciones que se-y ficieron al bandurrieru tradicional David Caballín nel añu 1982 y que rexistró Manuel S. López, miembru del grupu de recuperación e investigación musical "La Quintana" amás d'otres rareces como una grabación inédita fecha en Bonos Aires hacia 1960 polos bandurrieros Pepe Calvo y José Ramón Prida.

La bandurria ye instrumentu cásique desapaecíu na tradición musical asturiana, ello con tener va años un importante pesu na mesma. El vigulineru de Lliberdón lleva investigando cerca d'ocho años nesti instrumentu, que nun ye'l qu'usen les tunes y rondalles, faciendo referencia nel casu asturianu la pallabra "bandurria" a un instrumentu de cuerda esfregada asemeyáu al rabil que se toca na meseta.

Col enfotu de la recuperación del usu del instrumentu, apúrrese nel llibru al qu'acompaña esti discu, y que lleva nes llibreríes y tiendes yá dende'l mes d'abril, un métodu de bandurria pa deprender a tocala al estilu tradicional, según los datos recoyíos, incluyéndose les lletres de los cantares.