XLV Selmana de les Lletres: “Ye un reconocimientu debíu a un llabor impagable”, diz Gutiérrez

La gran celebración de la nuesa lliteratura yá ta en marcha. Entamó la XLV Selmana de les Lletres Asturianes, dedicada a Conceyu Bable, un homenaxe pa poner en valor un trabayu “munches veces silenciosu o silenciáu, que se tien que conocer”, rescampló la conseyera.

Pasáu’l meudía inauguróse na Biblioteca d’Asturies esta edición de la Selmana de les Lletres Asturianes, actu conducíu pol direutor Juan Miguel Menéndez Llana que contó cola participación de la responsable de Cultura, Política Llingüística y Deporte, Ana Vanessa Gutiérrez; el coordinador d’esta Selmana de les Lletres Asturianes, Francisco ‘Paco’ Álvarez; y Xune Elipe, direutor del documental sobre Conceyu Bable que se proyeutó llueu de les intervenciones. Ente’l públicu, el direutor xeneral d’Aición Cultural y Normalización, Antón García; dellos militantes de Conceyu Bable; y ciudadanos.

Menéndez Llana agradeció la presencia a los asistentes y apuntó que la entidá que xestiona “tien l’arguyu de tener na so coleición la mayor biblioteca asturianista” enantes de dar la pallabra a Álvarez. El periodista xixonés afirmó que “Conceyu Bable ye resultao d’un mileniu d’esistencia, d’insistencia y de resistencia d’esta llingua asturiana que siguimos falando”.

Recomendó la visita a les dos esposiciones programaes, amás de la preparada pol Muséu de Belles Artes d’Asturies, y convidó “a participar en tolos actos de la Selmana de les Lletres, que sirven de conocimientu y reconocimientu pa Conceyu Bable”. “Gracies a que fueron, somos y vamos siguir siendo”, aseguró al tiempu que celebró que “esti homenaxe llega a tiempu, porque pasó mediu siegu pero por suerte la mayor partes d’estes y estos conceyeros siguen vivos. Munches veces los homenaxes lleguen a títulu póstumu y presta tener a esta xente pa da-yos l’agradecimientu en persona por tol trabayu arrogante y valiente que fixeron en circunstancies y nun tiempu abegosu pa la llingua asturiana y pa la propia sociedá asturiana”.

Elipe, pela so parte, dio detalles del documental, que se va emitir mañana en TPA, y rescampló “la importancia real que tuvo y que tien esta asociación tovía, ensin la que nun s’entiende l’Asturies actual”. Citó la opinión esistente ente l’asturianismu de que nun se ganara, recoyida nun artículu de so entituláu ‘Ganar ensin ganar’, y comentó darréu que “l’Asturies actual ta formada y conformada, modulada, pola actividá d’asociaciones de xente como Conceyu Bable. Hai que tar arguyosos. Pensamos que nun ganamos, pero la realidá ye que ganamos. L’Asturies nun s’entiende ensin estos 50 años de llabor de Conceyu Bable”.

La fuerza del amor a lo propio

Encargóse de finar les intervenciones Gutiérrez, que señaló que “ye un honor poder tar equí como conseyera dende un Gobiernu comprometíu coles nuestres llingües propies, l’asturianu y l’eonaviegu, siguiendo la estela d’una lluz mui fuerte qu’españó cola más fuerza más poderosa que puede esistir, que ye la fuerza del amor propiu, del amor a lo propio y del amor propiu”. “Cuando falamos del llabor y la reivindicación de la llingua asturiana, falamos de la entrega diaria, desinteresada y comprometida de munches persones que se dediquen en cuerpo y alma mantener vives les nueses llingües propies dende diferentes y numberoros ámbitos. Munchos de los que tais equí, de vosotros y vosotres, sois eses persones”, siguió la escritora, “un llabor que tien muncho que que ver colo muncho que trabayaron les persones integrantes del colectivu al que rendimos homenaxe nesta Selmana de les Lletes, a Conceyu Bable”.

“Esti homenaxe ye un xustu reconocimientu a les persones qu’al traviés del so compromisu y el so esfuerciu consiguieron mantener la identidá cultura del pueblu asturianu hasta los nuesos díes pa qu’otros munches persones la continuaremos depués o lo intentáremos. Ye un necesariu tributu a aquel grupu d’estudiantes universitarios que col convencimientu de recuperar l’autoestima de los asturianos y asturianes reivindicaron l’arguyu der ser lo que somos, de lo que fuimos y de lo que vamos ser”, apuntó Gutiérrez.

La conseyera rescampló que “dende que publicaron los sos primeros artículos, nel 1974 na revista ‘Asturias Semanal’, hasta estas 45 Selmana de les Lletres Asturianes pasaron 50 años y gracies a esta asociación podemos falar de la lliteratura asturiana o de la lliteratura n’asturianu, que ta viviendo ún de los meyores momentos dela historia”. Asiná, confirmó que “namás no que va de sieglu yá contamos con cerca de 3.500 publicaciones n’asturianu y eonaviegu, unes cifres que nos inviten al optimismu”, anque ensin “cayer na autocomplacencia”.

“Non sólo falamos de lliteratura, por supuestu, falamos de derechos, de conciencia de ciudadanía, falamos de democracia, falamos de respetu, de diversidá y d’integración, falamos d’educación, falamos de señes d’identidá, de dignidá y d’arguyu”. Asina, recordó’l papel que “xugó esti colectivu na época de la Transición defendiendo la identidá asturiana y l’autoestima de nuestru pueblu; defendíen la creación de l’Academia de la Llingua Asturiana, que güei ye una realidá mui necesaria; defendíen la creación de la Xunta Xeneral del Principáu d’Asturies, el Parllamentu autonómicu, que güei ye la realidá que podemos ver na cai Fruela; defendíen un himnu propiu, que ye una realidá, como tamién ye la bandera d’Asturies; defendíen la enseñanza del asturianu y somos munches les persones que teníamos menos 6 años cuando se fundó Conceyu Bable –faciendo referencia a una broma anterior d’Álvarez al nacer la conseyera nel 1980– que tuvimos la oportunidá de ser escolarizaes nel conocimientu de la nuestra llingua gracies a la reivindicación d’estes persones”.

Una reivindicación que llevó tamién a la “recuperación d’elementos de la cultura asturiana como los deportes tradicionales, la música de gaita, la canción asturiana, el traxe del país o la sidra”. “Cuestiones defendíes por Conceyu Bable, munches asumíes polos partíos políticos asturianos y polo tanto pola sociedá asturiana a la que representen. Una d’elles ye’l convencimientu de que la oficialidá ye’l marcu llegal afayadizu pa garantizar los derechos llingüísticos de los asturianos y asturianes y pa la equiparación de les nuestres llingües al restu de les llingües oficiales del Estáu”, aseguró Gutiérrez.

Modificación y desarrollu de la Llei d’Usu

“Pa esti Gobiernu ye una cuestión irrenunciable, compartida por munches persones, y ye xusto agradecelo al camín empezáu por Conceyu Bable”, añadió al respeuto enantes d’enumberar les aiciones que tien en marcha l’Executivu pa la normalización del asturianu y gallego-asturiano, ente les que citó’l “compromisu del Gobiernu de modificar la Llei d’Usu pa los nuevos tiempos. Y non sólo la vamos desarrollar, sinón que vamos esplorar toles llinies d’actuación que permita esta norma”.

Pa finar, recordó que los miembros de Conceyu Bable “carecieron tamién, y ye xusto tamién dicilo, demasiaes veces la inxusticia de la difamación y del cuestionamientu, ensin dexar qu’esa presión, que ye muncha, doblegase l’enfotu que teníen en creer n’Asturies. Gracies tamién pola llección de xenerosidá que significa siguir alantre”.

“Esta selmana dedicámosla a homenaxar a Conceyu Bable porque ye un reconocimientu debíu a un llabor impagable, munches veces silenciosu o silenciáu, que se tien que conocer”, dixo la conseyera, que deseó a toles persones una “mui feliz celebración de la Selmana de les Lletres, pero sobre too, por Conceyu Bable, lo que debería dicir ye que sigáis teniendo una feliz reivindicación del arguyu de ser asturianos y asturianes, de la nuesa cultura y la nuesa llingua”.

Visita guiada pela esposición

L’actu de la Biblioteca d’Asturies finó cola inauguración de la muestra que se va poder visitar na entrada de la instalación per dos selmanes con una visita guiada pol coordinador Álvarez, na que munchos de los presentes animáronse a contar curiosidaes sobre dellos oxetos. Ésta lleva’l nome de ‘50 aniversariu de Conceyu Bable. Esposiciones de materiales’ y cuenta con semeyes, artículos, cartes, fiches de socios o pegatines que permiten viaxar a aquellos años de reinvidicación llingüística y cultural.

Na semeya, Elipe, Menéndez Llana, Gutiérrez y Álvarez.