Cúmplense cien años del mítin de Cuadonga que foi xerme de la Junta Regionalista

El 2 d’ochobre del 1916 celebróse’l mítin que se considera’l primer pasu de la creación de la Junta Regionalista, que se constituiría un mes depués nel Círculo Covadonga dUviéu. 3.000 persones, según el diariu ‘ABC’, anque otres fontes apunten que 6.000, acudieron al actu lideráu por Juan Vázquez de Mella.

“L’actu de güei ye’l primer capítulu d’un llibru que la so continuación sería les bases que redautó pal rexonalismu d’España. Depués reuniré nuna asamblea a les rexones de la cordillera cantábrica, y llueu constituyiré la Federación nacional. El too será como un cuerpu infinitu, dispuesto a emponderar lo caducu del réxime y establecer una España grande”, declaró’l políticu conservador nel actu polítucu de Cuadonga, nel que detalló el so programa rexonalista. L’eventu coincidía cola publicación del folletu ‘La Junta General del Principado. Bosquejo Histórico’, d’Álvaro Fernández de Miranda y Vives, vizconde de Campogrande.

Asina, declaróse partidariu de votu comparativu y de referéndum pa los casos importantes. “Sobre estes bases podrán llevantase les representaciones por conceyos, comarques y rexones, considerando indispensable la resurreición de les Xuntes del Principáu”. El discursu de Vázquez de Mella, “mui aplaudíu” según ‘ABC’, finó con una invocación a la virxe de Cuadonga. Como aneudota, el diariu madrilanu apunta que’l políticu d’orixe carlista sufrió una insolación pola que taba siendo atendíu por dos médicos.

Fecha fundacional del asturianismu políticu

1916 ye, pa munchos estudiosos, la fecha fundacional del asturianismu políticu. Nes eleiciones a les Cortes d’esi añu Vázquez de Mella consiguió representación pela circunscripción d’Uviéu xunto col so compañeru Ignacio Herrero nuna allianza conservadora xunida baxo los puntos programáticos de rexonalismu y catolicismu, asina como una solución pacífica a la cuestión social. Esti ésitu desembocaría na creación posterior de la Junta Regionalista.

La so intención yera coordinar les dereches asturianes baxo un programa rexonalista enfrentáu al lliberalismu. Vázquez de Mella foi’l so presidente honoríficu, pero’l real sería’l vizconde de Campogrande. Llueu llegaríen dos diputaos provinciales nel 1917 y once ediles nel Conceyu de Xixón, asina como representación n’importantes conceyos como Siero o Llaviana.

Yá nel 1918, nes xenerales, munchos conservadores garraron el discursu rexonalista, una tónica que comenzó a variar un añu depués col ascensu del partíu reformista n’Asturies, terminando la Junta Regionalista por disolvese.