Cubero: “La denuncia del centralismu madrilanu como una estructura opresiva adquier un protagonismu inéditu cola Junta Regionalista”

|
Cubero: “La denuncia del centralismu madrilanu como una estructura opresiva adquier un protagonismu inéditu cola Junta Regionalista”

Hai cien años, nel 1916, vivióse ún de los acontecimientos más importantes de la historia del asturianismu políticu: constituyíase la Junta Regionalista col carlista Juan Vázquez de Mella como cabeza más visible. L’historiador Javier Cubero de Vicente (Xixón, 1986) fala sobre esti movimientu políticu escaecíu nel rellatu históricu del país.

¿Qué significó p’Asturies esi 2 d’ochobre del 1916 nel que se celebró’l mítin de Cuadonga?

L’Asamblea Magna de Cuadonga implicó l’entamu d’un movimientu políticu que per primer vegada asitaba’l conflictu d’intereses ente la sociedá asturiana y el Poder Central como l’elementu central del so discursu. La denuncia del centralismu madrilanu como una estructura opresiva yá esistía dende hai abondu tiempu enantes, tanto nel carlismu foralista como nel republicanismu federal, pero la diferencia ye que cola Xunta Rexonalista del Principáu adquier un protagonismu inéditu.

¿Quién yera Vázquez de Mella?

Juan Vázquez de Mella (1861-1928), nacíu en Cangues d’Onís, yera per entós la principal figura del Partíu Carlista. Siendo mui mozu ya empecipió a collabor col diariu madrilanu ‘El Correo Español’, principal órganu d’espresión d’esta formación política, del que inclusive sería direutor demientres dellos años. De magar 1893 foi siempre escoyíu diputáu en representación de Navarra, cola única escepción del periodu nel que tuvo esiliáu en Portugal (1900-1905) por mor del fracasu d’un nuevu llevantamientu armáu n’ochobre de 1900. Dafechu les elecciones de 1916 foron les primeres nes que se presentaba como candidatu fuera del ‘feudu’ carlista de Navarra.

Tamién foi ún de los autores del Acta de Loredán (1897), el principal documentu programáticu del carlismu de la so dómina, qu’afitaba’l tradicionalismu corporativu como llinia ideolóxica del partíu en función de trés exes: la relixón católica, la monarquía llexítima, y les llibertaes forales, qu'incluyíen esplícitamente a “las antiguas instituciones de Galicia y Asturias”. Frente al iuspositivismu dominante nel so tiempu, que nun almitía nenguna otra fonte constituyente de normes xurídiques y autoridá  política que'l modernu Estáu lliberal, Vázquez de Mella reivindicaba'l papel de la sociedá civil al traviés, per un llau, de la costume popular como creadora de Derechu, y per otru, de los nomaos ‘cuerpos intermedios’ como esferes autónomes nuna estructura socio-política de calter federativu, lo qu'inevitablemente suponía la demanda del autogobiernu de los conceyos y de les rexones como un derechu natural, anterior y superior a les Constituciones madrilanes.

Esi mítin vien depués d’unos bonos resultaos eleutorales a les Cortes de Madrid. ¿Yeren esperables?

El so antecedente inmediatu atópase nel Comité Electoral Rexonalista que se crea, baxo la dirección del carlista Gonzalo Merás, presidente del Círculu Tradicionalista Cuadonga d’Uviéu, por cuenta de les eleiciones xenerales del 9 d'abril de 1916. La so finalidá ye impulsar la candidatura de Vázquez de Mella y d’Ignacio Herrero, un disidente del Partíu Conservador, na circunscripción d'Uviéu. Dambos candidatos tuvieron los votos necesarios pa consiguir l'acta parllamentaria.

En cierta manera esti bon resultáu podía ser esperable pola combinación de tres factores distintos: la grave crisis interna n’Asturies del otrora poderosu Partíu Conservador dende'l fallecimientu d’Alejandro Pidal y Mon en 1913, la fuerte y siguida implantación del Partíu Carlista nel conceyu d’Uviéu espresada al traviés del Círculu Tradicionalista Cuadonga y de los conceyales carlistes nel ayuntamientu, y la progresiva apaición d'un nuevu sector de ‘derecha católica’, mui críticu per entós col esquema bipartidista y caciquil del réxime de la Primer Restauración Borbónica, qu'asitiáu nuna posición intermedia ente'l lliberalismu conservador y el tradicionalismu carlista inda nun alcontrara la so propia traducción política.

¿Y l’ésitu del actu en Cuadonga?

La convocatoria de la nomada Asamblea Magna, qu'a la fin realmente tuvo más de mitin que d'aconceyamientu congresual, foi realizada por unos ventisiete comités rexonalistes que se constituyeron n’estremaos conceyos del país a lo llargo de los meses anteriores: Siero, Llaviana, Uxo, Noreña, Samartín del Rei Aureliu, Cabanaquinta, Ḷḷena, Bimenes, Piñeres, Peḷḷuno, Santibanes de la Fuente, Agüeras, Xixón, Morcín, Murias, Vegallana, Figaréu, Carabanzo, Grau, Pravia, Trubia, Bermiegu, Cangues d’Onís, Valdevácanu, Santa Cruz de Mieres, Valdecuna, Turón y Les Regueres. Tamién foi sofitada por delles agrupaciones carlistes (Cabanaquinta, Uviéu y Noreña), mauristes (Ayer), católiques-obreres (Mieres y Uviéu) y sindicales llabriegues (Ḥontoria, Caliao, Vega de Poxa, Tiñana, Llanera y Riosa).

Tou esti movimientu yera expresivu de que se taba produciendo una recomposición del mapa políticu d’Asturies. La creciente crisis de llexitimidá de los dos grandes partíos lliberales que se veníen turnando nel Gobiernu central, taba favoreciendo la conformación de nueves alliniadures polítiques en clave rexonalista. Pero nun se trataba d'un rexonalismu con vocación ‘centrista’, pues reclamaba l'autogobiernu asturianu dende una concepción doctrinal mui asemeyada a la del ‘Acta de Loredán’, pero escluyendo'l factor del llexitimismu dinásticu.

¿Qué dicen les cróniques sobre’l mesmu?

Nun esiste consensu sobre la cifra d'asistentes al mesmu, que según el periódicu puede xubir hasta 6000, como ye'l casu del diariu carlista ‘El Pueblo Astur’, o baxar hasta 2000. Nel actu Vázquez de Mella demandó la restauración de l'antigua Xunta Xeneral del Principáu, eslleida en 1834 pol Gobiernu isabelín, frente al centralismu d'importación estranxera.

El siguiente pasu foi la constitución de la Junta Regionalista. ¿Cuándo se fixo?

El 2 de payares ‘El Pueblo Astur’ informa de la so creación formal nun aconceyamientu celebráu na sede del Círculu Tradicionalista Cuadonga, asina como de la composición de la so direutiva, que taba presidida por Vázquez de Mella.

¿Naz con ello l’asturianismu políticu?

Depende de lo qu'entendamos por ‘asturianismu políticu’. Nun escaezamos que ‘asturianistes’ yá yeren nel sieglu XIX tanto los republicanos piimargallianos como los llexitimistes carlistes, na midida en que defendíen l'autogobiernu y los intereses d’Asturies como unidá singular dientro del marcu estatal español.

Amás de Vázquez de Mella, ¿qué otros axentes foron importantes nesti procesu?

Ignacio Herrero, con un grupu de siguidores separaos del Partíu Conservador; Gonzalo Merás, que sería escoyíu como secretariu de la directiva de la Xunta Rexonalista del Principáu; Fabriciano González ‘Fabricio’, escritor y defensor de la llingua asturiana, que dirixía'l periódicu xixonés ‘El Regionalista Astur’; ente otros.

La obra más simbólica espublizada por esti movimientu ye la ‘Doctrina asturianista’. ¿Qué  repercusión tuvo na so época?

Publicáu en 1918, esti llibru foi asumíu de manera oficial pola Xunta Rexonalista del Principáu. Los sos autores yeren Álvaro Fernández de Miranda, vizconde de Campo Grande; Ceferino Alonso Fernández, que por cierto tamién yera carlista; y José González. La so importancia se fundamenta en que ye'l testu políticu de la nuesa hestoria contemporánea con mayor radicalidá na reivindicación de les señes d'identidá nacional, incluyida la llingua, con anterioridá al surdimientu de Conceyu Bable na década de 1970. Por desgracia’l camín ideolóxicu qu'abría esta obra tuvo escasu desendolcu nel so tiempu.

¿Hai más documentos destacaos?

El mesmu Álvaro Fernández de Miranda con motivu de l'Asamblea Magna de Cuadonga publicó un folletu tituláu ‘La Junta General del Principado de Asturias. Bosquejo histórico’.

¿En qué contestu estatal trunfen eses idees rexonalistes?

Nel marcu d'una crisis de réxime, na cual l'esquema bipartidista d'alternanza gubernamental yá ta en quiebra, lo qu’imposibilita la formación de gobiernos homoxéneos y estables, pero los movimientos contrarios al réxime sicasí nun tienen la fuercia necesaria pa derrocalo. Ente los años 1916 y 1923 van asocedese en Madrid dieciséis gobiernos distintos.

¿Qué pesu tuvieron nes eleiciones a Cortes qu’hebo n’años posteriores?

Nes eleiciones del 24 de febreru de 1918 seríen escoyíos cinco diputaos rexonalistes (les actes que correspondíen a Asturies yeren unes catorce): Álvaro Armada, Ignacio Herrero, Santiago Pidal, Manuel Loring y Ramón Navia Osorio, peles circunscripciones de Xixón, Uviéu, Villlaviciosa, Balmonte y Castropol, respeutivamente. Pero nes eleiciones del 1 de xunu de 1919 la representación parllamentaria de la Xunta Rexonalista va quedar amenorgada a dos diputaos: Ignacio Herrero y Manuel Loring, per Uviéu y per Balmonte otra vuelta.

¿Por qué se disuelve la Junta Regionalista?

Va sumiendo pasu ente pasu. La Xunta Rexonalista nun tenía una estructura formal como partíu políticu, sinón que yera una plataforma federativa de base municipalista, na que participaben tanto comités rexonalistes creaos ex novo como agrupaciones d’otru tipu como los círculos carlistes. L’incrementu de la conflictividá social y política de magar el fin de la Primer Guerra Mundial diría privilexando l'escenariu políticu estatal sobre l'asturianu. Nun debemos d'escaecer tampoco l'impactu que tuvo la Revolución rusa sobre amplios sectores de la derecha.

¿Son estos movimientos rexonalistes, al igual que los federalistes, que tuvieron cierta implantación na sociedá asturiana a finales del XIX y primeros del XX los grandes escaecíos y desconocíos de la historia política asturiana?

El rexonalismu asturianu como'l republicanismu federal son grandes escaecíos nel rellatu hestóricu del país, pero polo menos ehí tán los trabayos de Pablo San Martín, Sergio Sánchez Collantes o Faustino Zapico, ente otros, que progresivamente van faciendo avanzar la ciencia hestórica. Pero'l gran desconocíu de la nuesa hestoria ye'l carlismu asturianu. Anguaño nun esiste tovía nenguna monografía científica sobre les guerres carlistes n’Asturies, nin sobre la prensa carlista asturiana a lo llargo de la Primer Restauración Borbónica, nin sobre la oposición del carlismu asturianu a la dictadura franquista.

Cubero va presentar, el llunes 21 de payares (20 hores, Club La Nueva España de Gijón), la mesa redonda 'El rexonalismu asturianu y l’Asamblea de Cuadonga', que va tener como ponentes a Xuan Xosé Sánchez Vicente, ensayista, miembru de l’Academia de la Llingua Asturiana y presidente del Partíu Asturianista (PAS); y José Girón Garrote, caderalgu d’Hestoria Contemporánea de la Universida d’Uviéu y autor de 'Los partidos políticos en Asturias (1875-1923)'.

Contador Estadistiques