Convocáu'l XXIX Premiu al Pueblu Exemplar

La Fundación Princesa de Asturias espubliza les bases nes trés llingües del país.

Yá ta abiertu'l plazo de presentación de candidatures pal XXIX Premiu al Pueblu Exemplar d'Asturies y yá comenzó la distribuición de la publicación que recueye la convocatoria y el reglamentu d'esti premiu un añu más en castellanu, asturianu y gallego-asturiano. A esti gallardón, que nel 2017 foi pa Poreñu, pue aspirar aquel "pueblu, aldea, nucleu de población, espaciu paisaxísticu o grupu humanu del Principáu d'Asturies que destacara de mou notable na defensa y conservación del so entornu natural, ambiental, del so patrimoniu históricu, cultural o artísticu, n'iniciatives d'impulsu económicu y social o na realización d'obres comunales u otres manifestaciones de solidaridá sobresalientes”.

Instituciones, centros culturales, asociaciones de vecinos, entidaes y empreses, asina como ciudadanos de forma particular, van poder proponer candidatures hasta les 14 hores del xueves 2 d'agostu. El ganador va recibir una recompensa de 25.000 euros.