La Fundación Príncipe de Asturias usa l’asturianu y l’eonaviego na convocatoria a Pueblu Exemplar

El reglamentu del Premiu al Pueblu Exemplar, qu’entama la Fundación Príncipe de Asturias, espublizóse n’asturianu y gallego-asturiano, amás d’en castellanu. Ésta ye la primer vez que la entidá utiliza les trés llingües que se falen nel país.

El Serviciu de Política Llingüística collaboró cola Fundación pa tornar esti reglamentu tanto a l’asturianu como a la fala, fechu que destaquen dende la propia organización nuna nota de prensa. D’esta forma, les poblaciones interesaes n’algamar esti gallardón con repercusión a nivel estatal y una recompensa económica de 25.000 euros van poder consultar les bases del premiu y presentar la candidatura na llingua propia de la so zona.

En concreto, pueden aspirar al XXV Premiu al Pueblu Exemplar d’Asturies el “pueblu, aldea, nucleu de población, espaciu paisaxísticu o grupu humanu del Principáu d’Asturies que destacara de mou notable na defensa y conservación del so entornu natural, ambiental, del so patrimoniu históricu, cultural o artísticu, o tamién na realización d’obres comunales u otres manifestaciones de solidaridá sobresalientes”. El plazu de presentación de candidatures p’asoceder nel palmarés del gallardón a la comunidá vecinal de Teberga fina’l 7 d’agostu.