Ciudadanos llega a un alcuerdu con Rajoy pa sofitar los Presupuestos Xenerales del 2018

|
Albert Rivera

Albert Rivera anunció esti llunes un alcuerdu col Gobiernu pa sofitar los Presupuestos Xenerales del Estáu que van ser aprobaos el martes nun Conseyu de Ministros estraordinariu. L’apoyu de Ciudadanos, sicasí, nun ye suficiente pa un Partido Popular (PP) que necesita más votos, cola mirada puesta principalmente nel EAJ-PNV.

“Gracies a Ciudadanos, Montoro y Rajoy tuvireron qu’aceptar lo que nu queríen: baxar los impuestos a los españoles', destacó nun tonu trunfador el presidente del partíu naranxa. Les concesiones de los populares pa poder sacar alantre les cuentes son una baxada del Impuestu sobre la Renta pa les Persones Físiques (IRPF) pa les rentes ente 14.000 y 17.000 euros, la xuba de les pensiones perriba del Índiz de Precios de Consumu (IPC) pa 7,2 millones de pensionistas (rebaxa fiscal d’ente 30 y 60 euros pa persones con una prestación d’ente 1.000 y 1.200 euros y un complementu fiscal negativu pa los que cobren ente 600 y 1.000 euros), una selmana más de baxa por paternidá, un cheque de 1.000 euros añales pa la educación de los fíos ente 0 y 3 años, y 500 millones pa la equiparación real de los sueldos de policíes y guardias civiles.

Pese al apoyu de Ciudadanos (32 escaños) el PP (134) nun tien la cantidá suficiente de votos pa sacar alantre les cuentes (176), siendo l’oxetivu principal sumar, al igual que l’añu pasáu, al EAJ-PNV (5), cuando tamién tuvieron el preste de Foro (1), UPN (2), Coalición Canaria-Partido Nacionalista Canario (1) y Nueva Canarias (1). La formación vasca yá avisó a los populares de que nun habría alcuerdu de siguir l’aplicación del artículu 155 de la Constitución en Catalunya.

Tres la so aprobación, el Gobiernu va tener trés meses pa negociar con otros partíos p’algamar la mayoría necesaria qu’evite una prórroga presupuestaria.

Na semeya, Rivera nel momentu de dar anuncia del alcuerdu.

Contador Estadistiques