Sáenz de Santamaría anuncia una inversión n’Asturies de 215 millones n’infraestructures nos PXE

Mariano Marín tomó posesión del cargu de delegáu del Gobiernu estatal n’Asturies esti martes en sustitución de Gabino de Lorenzo, que dexó’l cargu tres cumplir 75 años. La vicepresidenta Soraya Sáenz de Santamaría anunció una inversión nos Presupuestos Xenerales del Estáu (PXE) de 215 millones n’infraestructures.

D’esa cantidá, 86,4 millones diríen a les obres de la variante de Payares, mentes que 11,2 pa la meyora de les cercaníes n’Asturies, siendo’l gastu total n’infraestructures ferroviaries de 127,5 millones d’euros. Según destacó la popular, supón una medra del 40,4 por cientu con respeuto a la inversión nesti aspeutu nel 2017.

Les carreteres llevaría nestos presupuestos 50 millones, siendo la mayor partida la de l’autovía a La Espina, unos 12 millones. L’aeropuertu recibiría 6 una inversión de 6 millones y los puertos, de 20.

En total, la medra n’infraestructures con respeuto a les cuentes del 2017 sería d’un 19,5 por cientu nel casu de que salieren alantre los PXE. Pa ello, el Partido Popular (PP) necesitaría l’apoyu nel Congresu de dellos partíos amás del yá confirmáu de Ciudadadanos, como’l de Foro y el d’EAJ-PNV, formación ésta última que yá amosó la so negativa a sofitalos de siguir l’aplicación del artículu 155 de la Constitución en Catalunya.

Sáenz de Santamaría adelantó estos datos na toma de posesión de Marín, presidente del PP xixonés y hasta agora voceru del grupu municipal popular, como delegáu del Gobiernu, actu nel que tuvo presente’l presidente del país, Javier Fernández, y el conseyeru de Presidencia y Participación Ciudadana, Guillermo Martínez Suárez.

Semeya de Pool Moncloa/César P. Sendra.