Catorce actividaes más van rematar el #FormientuEnCasaFest

La cuarta fola del #FormientuEnCasaFest trai catorce eventos más pa rematar dos meses d’actividá d’un certame que nació pa poner en valir la cultura asturiana. “Esti festival demuestra la so potencia y xenerosidá cola sociedá nun momentu difícil”, destaca la organización, que cifra en más de 80.000 los espectadores que vienen siguiéndolu dende les sos cases nesti tiempu.

La plataforma lliteraria Formientu torna a ampliar el so festival cultural qu’echó a andar col entamu del aisllamientu de la población pola mor de la pandemia de coronavirus. “Magar que la sociedá asturiana yá ta relaxando les condiciones del acorriapamientu paecíanos, polos testimonios que mos lleguen, que sigue siendo importante tar ehí ufriendo un escaparate pa la cultura asturiana”, esplica Inaciu Galán, coordinador d’esti festival xunto a Diego Solís.

El #FormientuEnCasaFest amplía asina hasta’l día 17 la so programación pa sumar más 60 actividaes dende’l 18 de marzu que siguieron más de 80.000 espectadores. “Esti festival demuestra la potencia de la cultura asturiana y la so xenerosidá cola sociedá nun momentu difícil”, asegura Galán, que recuerda que tolos participantes “collaboraron de forma desinteresada pa ufrir a la sociedá una ufierta cultural completa a lo llargo d’estos díes tán complicaos”.

Conciertos, recitales, charres, alcuentros y talleres col asturianu como llingua vehicular y la cultura asturiana como protagonista van siguir tolos díes a les 19 hores dende güei, cuando la escritora María Esther García López va lleer poesíes propies. Xosé Ambás y Ramsés Ilesies, Pablo. A Quiroga, Xosé Fernández Estrada, Rafa R. Valdés o Andrea Joglar son dalgunos de los nomes de la cuarta fola del #FormientuEnCasaFest, que van rematar Solís y Galán el día 17 con una sesión pa facer un balance del certame “y abrir interrogantes y facer propuestes de futuru no que cinca a la industria cultural asturiana”.

Cuarta fola del #FormientuEnCasaFest:

Llunes 4: María Esther García López, Recital lliterariu.
Martes 5: Daniel Lobete, charra 'El cántabru: situación y perspectives del asturllionés en Cantabria'.
Miércoles 6: Xosé Fdez. Estrada, charra 'La mayoría del fútbol'.
Xueves 7: Rafa R. Valdés, charra 'Corvera lliteraria'.
Vienres 8 (17 hores): Humber Sierra, presentación de 'L’últimu aliendu' de Misiva.
Sábadu 9: Tiégui Alves, charra 'L’asturllionés en Portugal, la mio esperiencia col mirandés'.
Domingu 10: Xurde Menéndez Caravia, charra 'Divulgación ciéntifica n’asturianu: claves pal futuru'.
Llunes 11: Andrea Joglar, conciertín-alcuentru.
Martes 12: Xosé Ambás y Ramsés Ilesies, conciertu.
Miércoles 13: Diego Castañón, charra 'El rap n’Asturies'.
Xueves 14: Pablo A. Quiroga, charra-taller 'El guión nel curtiumetraxe asturianu'.
Vienres 15: Illán Escalada, charra 'El futuru de la música asturiana'.
Sábadu 16: Alma Hidalgo, recital poéticu.
Domingu 17: Diego Solís y Inaciu Galán, balance del #FormientuEnCasaFest 'La cultura asturiana nel andanciu, ¿y agora, qué?'.