El #FormientuEnCasaFest, con 100.000 visualizaciones, tien continuidá con un concursu de guiones de curtios

Les 62 actividaes que conformaron el #FormientuEnCasaFest del 18 de marzu al 17 de mayu nel confinamientu por cuenta la pandemia de COVID-19 sumen más de 100.000 visualizaciones. El certame de la revista lliteraria tien continuidá con un concursu de guiones de curtiometraxes en collaboración con Algamar y Cuatro Gotes.

La charra-taller de Pablo A. Quiroga, responsable de la primer productora, 'El guión nel curtiumetraxe asturianu' sirvió de xerme a esta iniciativa que tien como plazu d’entrega de trabayos el 15 de xunu. La temática ye llibre, cola opción de presentalo n’asturianu o gallego-asturiano, y los trés ganadores van llevar como premios un diploma, revistes de ‘Formientu’, llibros y discos.

Amás, la revista de lliteratura moza comprométese a espublizar el guión o parte d’él na espublización “asina como a promover la grabación de los curtios, siempres que seya posible”. Tolos trabayos han de ser orixinales y inéditos.

Participación altruísta

Inaciu Galán y Diego Solís foron los coordinadores del #FormientuEnCasaFest, el festival “más llargu de los celebraos nel tiempu de cuarentena n’Europa” que foi posible “gracies a l’arragoncia de les más de 60 persones del mundu de la cultura d’Asturies que participaron de forma altruista col envís de da-y difuisión a la cultura y a la llingua asturiana”, esplica’l primeru. 26 muyeres y 34 homes de toles xeneraciones conformaron la llista na que destaquen nomes como los d’Alfredo González, Silvia Quesada, Sergio Buelga, Raquel F. Menéndez, Xaime Martínez, Arantza Margolles, Marisa Valle Roso, Laura Marcos, Xosé Ambás y Ramsés Ilesies, Rodrigo Cuevas, Pilar Sánchez Vicente o María Esther García López, ente otros.

Les actividaes, pensaes dende una visión amplia de la cultura y tocando otros ámbitos de forma tresversal, consistieron en 13 conciertos, 30 charres, 11 recitales lliterarios y presentaciones de llibros, 4 cuentacuentos pa la reciella y 3 talleres lliterarios en dos meses de tiempu, dende’l 18 de marzu, con trés ampliaciones del programa. Los actos tuvieron tamién la intención de representar a tolos territorios onde se fala asturianu o asturllionés, con participación de persones del mundu la cultura de Lleón, Cantabria y Miranda de l Douru.

Esti festival, qu’acumula más de 100.000 visualizaciones ente los direutos y les feches a posteriori, “permitió demostrar la bayura d’actividaes creatives qu’ufre l’ámbitu de la cultura asturiana que s’espresa n’asturianu”, apunta Galán. Solís añade qu’esta inciativa “ha sirvinos pa reflexonar sobre les oportunidaes qué mos dan les tecnoloxíes y que quiciabes nun tuviéremos aprovechando abondo enantes d’esta situación”.

Na imaxe, Solís y Galán.