El #FormientuEnCasaFest confirma la vitalidá de la cultura asturiana con una ampliación nueva del certame

Mes y mediu d’actividaes diaries en llingua asturiana. El #FormientuEnCasaFest, qu’echó a andar el 18 de marzu, allárgase hasta’l 3 de mayu “pola bona acoyida del públicu” y “pola multitú de propuestes que lleguen cada día a la organización”, confirmando asina la gran vitalidá del idioma y de la cultura asturiana.

“No que va de confinamientu nun hai precedentes d’un festival per streaming que tuviere una duración similar nel Estáu español y menos nuna llingua minorizada”, esplica Diego Solís, coordinador del #FormientuEnCasaFest xunto con Inaciu Galán. El festival nació dende Formientu, la revista de lliteratura moza, “como regalu a la sociedá y reivindicación a les alministraciones pa implicase nel sostimientu del trabayu del colectivu de creadores y de la ufierta cultural a la sociedá”, apunten.

Nesta segunda ampliación del certame, que principia esta tarde, van participar Rodrigo Cuevas, Rubén Bada, Tante Blanco, Pilar Sánchez Vicente, Solinca Turbón, María Luz Pontón y Pedro Durán, ente otros, destacando nesta ocasión Matthew Stuckwisch, profesor universitariu norteamericanu que deprendió va años asturianu y que falar de la so esperiencia cola lliteratura y la llingua asturiana dende los Estaos Xuníos. Toos ellos participen de manera desinteresada.

“Esto amuesa non solo la vitalidá de la creación n’asturianu, sinón el compromisu de los mesmos pa cola sociedá asturiana nun de los momentos más complicaos de la nuesa historia reciente”, esplica Galán. La hora d’entamu de toles actividaes va ser les 19 hores, a esceición de delles actividaes infantiles que van ser al meudía.

Tercer fola del #FormientuEnCasaFest:

• Xueves 16: Solinca Turbón, charra-recital 'Dellos testos inéditos'.
• Vienres 17: Tante Blanco, conciertín.
• Sábadu 18 (12 hores): Helena Trexu, llectura de 'Mitoloxía asturiana pa la reciella'.
• Sábadu 18 (19 hores): Rodrigo Cuevas, alcuentru-entrevista col artista.
• Domingu 19 (12 hores): Beatriz Rato Rionda, cuentacuentos pa la reciella.
• Domingu 18 (19 hores): Eva Cameán (Blogue Clarión), charra 'Esperiencia d’una bloguera lliteraria y recomendaciones de llibros asturianos dende Galiza'.
• Llunes 20: Milio Ureta, recital/presentación de 'Poemes del amor simétricu'.
• Martes 21: Pilar Sánchez Vicente, charra 'Muyeres confinaes: del maltratu al sostén'.
• Miércoles 22: Vítor Suárez, charra 'Traduciendo a Clarín, esperiencia y dificultaes'.
• Xueves 23: Gonzalo Llamedo, charra 'Anovación educativa na universidá: dando blincos pola tresversalidá'.
• Vienres 24: Ástor Llaneza, charra 'Simbiosis: una hestoria de cooperación ente seres vivos'.
• Sábadu 25 (12 hores): Maggy, cuentacuentos pa la reciella.
• Sábadu 25 (19 hores): Marcos Salázar, pica-pica de cultura asturiana.
• Domingu 26: Pedro Durán, charra 'Presente y futuru del audiovisual n’asturianu'.
• Llunes 27: Aymara González, tallerín 'Traducción al asturianu: conceptos y entamos'.
• Martes 28: Claudia Lueje, charra 'Dir de monte ensin salir de casa'.
• Miércoles 29: Daniel Guerra, charra 'Producción cultural en llionés'.
• Xueves 30: Matthew Stuckwisch, charra 'Lliteratura y llingua asturiana dende los Estaos Xuníos'.
• Vienres 1: Rubén Bada, conciertín.
• Sábadu 2: Mónica Jiménez, charra '¿Qué pintaben les muyeres asturianes? De lo llocal a lo global'.
• Domingu 3: María Luz Pontón, charra 'La tele de los escolinos, una esperiencia pionera de televisión n’asturianu'.