Castropol conviértese nel conceyu númberu 69 n’oficializar la toponimia tradicional

El procesu de recuperación toponímica entama la so particular cuenta atrás. Yá son nueve los conceyos que queden por dar el pasu d’oficializar los sos nomes de llugar tradicionales depués de que’l Conseyu de Gobiernu diera’l preste al decretu de Castropol, pendiente namái d’espublizase nel BOPA pa entrar a valir.

Catorce años pasaron dende que s’abrió l’espediente, nel 2007, hasta que se completó’l procesu de Castropol. El dictame de la Xunta Asesora de Toponimia necesita’l preste del Conceyu, l’aprobación en Plenu municipal y pasar un periodu d’información pública enantes de ser una realidá y llegar al Conseyu de Gobiernu, final d’un camín al que se llegó’l vienres depués de que s’acelerasen los alcuerdos nel añu últimu.

D’esta forma Castropol recupera los topónimos tradicionales, que van pasar a ser los únicos oficiales, derogando los castellanizaos. Ye’l conceyu númberu 69 en facelo y la previsión de la Conseyería de Cultura, Política Llingüística y Turismu ye completar esti procesu entamáu nel 2005 cola aprobación de los nueve espedientes pendientes, los de Llanera –yá avanzáu–, Somiedu, Cuideiru, Ayande, Caravia, Ibias, El Valle Baḥu de Peñamellera, Salas y Navia.

Semeya obra de Raimundo Pastor baxo llicencia CC BY-SA 4.0.