As Figueiras, San Xuan, Piñeira y Siares yá son topónimos oficiales

Los 296 topónimos recoyíos pola Xunta Asesora de Toponimia en Castropol yá son los únicos oficiales del conceyu. As Figueiras y Piñeira sustitúin a los castellanizaos ‘Figueras’ y ‘Piñera’, mentes que s’opta pola forma billingüe en Siares/Seares y San Xuan/San Juan, derogando’l nome de llugar ‘Moldes’ pa esta parroquia última.

La espublización del decretu toponímicu de Castropol nel Boletín Oficial del Principáu d’Asturies (BOPA) de güei completa’l procesu de recuperación de los topónimos tradicionales del conceyu entamáu en febreru del 2007, que pasen a ser los únicos oficiales. Conviértese asina nel númberu 69 en dar esti pasu.

Son cuatro les parroquies que pasen a tener el nome llocal, anque dos d’elles con forma billingüe. Ye’l casu de Siares/Seares, hasta agora ‘Seares’, y San Xuan/San Juan, que pierde’l nome ‘Moldes’.

Otros topónimos de llugares que se recuperen, ente otros munchos, son A Bruiteira (sustitúi a ‘Bruiteira’), Brañatruiye (a ‘Brañatuille’), El Tombín (a ‘Tombín de Barres’), Requeixo (a ‘Requejo’) o Barrionovo (a ‘Barrinuevo’), optando por una forma billingüe pa Lindigún/Donlebún, na parroquia de Barres. D’igual forma oficialícense nomes non rexistraos hasta’l momentu, como El Seixo, Paraxes, A Punta, A Lagúa, Loureiro, El Gondán, Regocavado, Outurel o Vieiro.

Nueve pa completar el procesu

Llueu de l’aprobación del decretu de Castropol, namái queden 9 conceyos por completar el procesu entamáu nel añu 2005. Son Llanera –yá avanzáu–, Somiedu, Cuideiru, Ayande, Caravia, Ibias, El Valle Baḥu de Peñamellera, Salas y Navia.

Na semeya, As Figueiras.