La toponimia tradicional de Pravia pasa a ser la única oficial

Los topónimos Arangu, Cordoveiru, Courias, Escuréu, San Damías y Muros yá son oficiales. El BOPA espublizó’l decretu qu’afita los nomes de llugar de Pravia que pasen a ser los únicos válidos tres un importante estudiu y el preste del Conceyu en Plenu, ente los que rescampla l’usu de Somáu pa sustituyir el castellanizáu ‘Somado’.

Pravia ye’l conceyu númberu 68 en recuperar la so toponimia oficial. Depués de l’aprobación del espediente por parte del Conseyu de Gobiernu, namái faltaba’l so asoleyamientu nel Boletín Oficial del Principáu d’Asturies (BOPA) pa qu’entrara a valir.

Asina, güei desapaecen ‘Arango’, ‘Cordovero’, ‘Corias’, ‘Escoredo’, ‘Sandamías’ y ‘Somado’, parroquies que pasen a tener el so nome tradicional Arangu, Cordoveiru, Courias, Escuréu, San Damías y Muros, de manera respeutiva. No que respeuta a la población de ‘Somado’ pasa a ser Somáu, el mesmu qu’apaez nel Nomenclátor de l’Academia de la Llingua Asturiana, y non finalmente ‘Somao’, que foi’l qu’emplegó la Fundación Princesa de Asturias na edición última del Premiu al Pueblu Exemplar d’Asturies que llevó esti llugar pravianu.

Otros cambios que s’atopen ye Ablanéu por ‘Ablanedo’, Villamexán por ‘Villameján’, Cañéu por ‘Cañedo’, El Calieiru por ‘Caliero’, Recuevu por ‘Recuevo’ o San Bartuelu por ‘San Bartolomé’. Tamién s’inclúin numberosos topónimos menores enantes non rexistraos como El Cogollu, Llanteiru, L’Estornín, En Casa Pablu, La Covarona o Sulallousa.

Queden 10 conceyos

La escoyeta d’estos nomes vien tres un llargu estudiu previu y trabayos de campu con entrevistes colos vecinos más veteranos residentes nos llugares. L’espediente definitivu pasa al Conceyu, que pue proponer cambios, y ponse n’esposición pública pa que los ciudadanos puedan presentar alegaciones enantes d’aprobalu en Plenu y llevalu al Conseyu de Gobiernu.

Tres espublizase nel BOPA pasen a ser los únicos oficiales, derogando la toponimia castellanizada. Nestos momentos queden diez conceyos por finar esti procesu, cola intención de que l’añu qu’entra se completen los 78: Llanera –yá avanzáu–, Castropol, Somiedu, Cuideiru, Ayande, Caravia, Ibias, El Valle Baḥu de Peñamellera, Salas y Navia.