Bras Rodrigo fai un viaxe musical pel Arcu Atlánticu en ‘A pause in New York’

|

El maestru gaiteru Bras Rodrigo ta acabante d’espublizar el so segundu trabayu discográficu: ‘A pause in New York’ (Goxe Producciones). Nesti discu’l de Perlora fai un viaxe musical pel Arcu Atlánticu nel que recopila les sos esperiencies por estes tierres.

‘A pause in New York’ llega once años depués de ‘Xermandía’, el so primer álbum discográficu como gaiteru solista, anque nesti tiempo Rodrigo nun aparó cola so trayeutoria musical, venceyada principalmente a la Banda de Gaites de Corvera d’Asturies, una de les más internacionales del país y la primera non irlandesa o escocesa en ser nomada meyor formación del prestixosu Saint Patrick´s Day Parade de la ciudá estauxunidense qu’apaez nel títulu d’esti trabayu. “Quier ser un viaxe musical per tola xeografía del llamáu Arcu Atlánticu, una rexón que va más acullá de lo estrictamente xeográfico, con llazos culturales comunes dende l’antigüedá. Trátase d’unes tierres rellacionaes ente sí que funden los sos raigaños na mesma prehistoria; los xeógrafos falen tamién de la influyencia del entornu natural na construcción d’un paisaxe cultural asemeyáu nes costes occidentales europees, anque la obra de Bras Rodrigo abarca un territoriu más ampliu que va dende Escandinavia hasta’l Finisterre na Península Ibérica”, espliquen dende Goxe Producciones.

Nel discu van poder atopase, poro, temes inspiraos nesos llugares visitaos por Rodrigo, amás d'arreglos de delles melodíes tradicionales de los mesmos. “La orixinalidá d’esta obra reside en que quier dar una visión de conxuntu del marcu xeográfico-cultural nel que ta asitiáu Asturies. Les pieces muestren estilos bien distintos, con aires acústicos, electrónicos, new age, rockeros o más comerciales”, apunta la discográfica pa después definir la obra como “ecléctica y ensin complexos”.

Contador Estadistiques