443 casos nuevos de COVID-19 esti llunes

El 84,24 por cientu de la población de 50 a 59 años yá tien la pauta completa de la vacuna.

A falta de la espublización de los datos oficiales de la COVID-19, la Conseyería de Salú informó de la detección de 443 casos nuevos ayeri –l'actualización suma 40 casos más non contabilizaos en díes anteriores–. Son 9 menos que'l domingu, cuando se comunicaron 452, y trátase d'una cifra cercana a la media diaria de la selmana pasada, que foi de 448.

El Serviciu de Salú del Principáu d'Asturies (SESPA) fixo 3.969 pruebes de diagnósticu d'infeición activa, polo que la tasa de positividá s'asitia nel 13 por cientu, inferior a la de la xornada anterior, del 15,79 por cientu con 3.245 tests realizaos. A 7 díes, esti porcentaxe yera enantes de l'actualización del 14,64 por cientu –ayeri xubió al 14,8 por cientu–.

Nun hebo que llamentar finaos, polo que'l total de persones que perdieron la vida cola enfermedá causada pol coronavirus SARS-CoV-2 caltiénse en 1.982. Tán ingresaos en planta 64 pacientes con confirmación o sospecha de COVID-19, 3 menos que'l domingu, y otros 15 na UCI, 1 más.

Llamamientu a persones de más de 50 años

Ocho de cada diez persones mayores de 50 años, concretamente el 84,54 por cientu, tienen la pauta completa de vacunación, mentes qu'un 95,09 por cientu cuenta cola primer dosis alministrada. El conseyeru de Salú, Pablo Ignacio Fernández Muñiz, alvirtió ayeri que la mayoría de los ingresos hospitalarios actuales correspuenden a persones de cerca de 50 años non vacunaes, yá sía por pertenecer a los 1.403 del tramu de 50 a 59 años que refugaron el preparáu o por ser de los que nun pudieron ponela'l so día por tar enfermos.

Pa estes persones el SESPA abrió una ventana nueva pa la so vacunación, al igual que fixo pa los mayores de 60, qu'entá se caltién. Estes persones pueden solicitar cita rellenando esti formulariu, seleicionado la opción 'Llamamiento extraordinario de vacunación'.