Barreiro gana, otra vegada cuatro años depués, el Premiu Máximo Fuertes Acevedo d’ensayu

Nel 2014, nel 2018 y nel 2022. Damián Barreiro llevó per tercera ocasión, otra vegada cuatro años depués, el Premiu Máximo Fuertes Acevedo d'ensayu nesta ventena octava edición de gallardón por ‘Asturianía kitsch: decálogu de la cultura pop ástur’, repitiendo asina l’ésitu que tuvo con ‘Caleya Sésamu: el papel de la televisión na tresmisión interxeneracional de la llingua’ y ‘Asturploitation’.

Como ye vezu, Antón García, direutor xeneral de Política Llingüística, presidió’l xuráu d’esti gallardón de los Premios Lliterarios que cuenta con una recompensa de 6.000 euros, mentes que Laura Marcos, filóloga de la Direición Xeneral, actuó como secretaria. Tuvo conformáu nesta ocasión pola historiadora Verónica Fueyo y los tamién filólogos Marta López Fernández, María Cueto, Jorge Arturo Sierra y Ramón d’Andrés, que ganara la edición pasada con ‘Una ciencia ensin enfotu’.

Ente los doce trabayos presentaos decidiéronse pol de Barreiro, que “analiza la cultura asturiana moderna dende una perspectiva novedosa, percorriendo los sos iconos con datos nuevos sobre temes y personalidaes que’l públicu va reconocer y va sentir como propios”. L’acta rescampla tamién “l’amenidá y l’interés” del testu.

Llicenciáu en Periodismu pola Euskal Herriko Unibertsitatea, máster en Xestión Cultural pola Universitat Oberta de Catalunya (UOC) y especialista universitariu en ‘Asturies. Espaciu, Patrimoniu, Historia, Cultura’ pola Universidá d’Uviéu, l’avilesín nacíu nel 1984 en Galicia trabaya como periodista en llingua asturiana n’Europa Press depués de pasar peles redaiciones d’Asturies.com y Les Noticies. Amás de como escritor d’ensayos, rescampla poles sos collaboraciones en programes de RTPA y pola so actividá en plataformes como YouTube, onde crea conteníu pa la canal propia ‘Horros & Frixuelos’.

Cuartu gallardón en fallase

El Máximo Fuertes Acevedo ye’l cuartu de los siete Premios Lliterarios que convoca la Conseyería de Cultura, Política Llingüística y Turismu en fallase. El primeru, en xunetu, foi’l XIV Premiu Alfonso Iglesias de cómic, que ganó Guillermo Menéndez Quirós con ‘Ana María. La Llobera d’Asturies’, y selmanes depués comunicóse’l XXVIII Premiu Xuan María Acebal de poesía, que foi pa Marta Mori por ‘Los carreros del tiempu’, mentes que’l vienres diose a conocer el II Premiu Enriqueta González Rubín de narrativa moza, que foi p’Andrés Fernández Menéndez por ‘1929’.