Un ensayu de Barreiro sobre la importancia de la programación televisiva infantil na normalización del idioma, XX Premiu Máximo Fuertes Acevedo

‘Caleya Sésamu: el papel de la televisión na tresmisión interxeneracional de la llingua’ resultó l’ensayu ganador del XX Premiu Máximo Fuertes Acevedo. El periodista Damián Barreiro ye l’autor d’esta obra merecedora del gallardón qu’entrega la Conseyería d’Educación, Cultura y Deporte.

El xuráu del premiu, presidíu pola direutora xeneral de Política Llingüística, Ana Fueyo, y conformáu polos escritores y investigadores Naciu Llope, Xosé Antón Suárez Ponte y Luis Casteleiro, aconceyó na tarde d’ayeri y decidió por unanimidá conceder el premiu –con una recompensa de 3.000 euros– al ensayu de Barreiro, presentáu baxo’l nomatu ‘Son Goku’. Los espertos decidiéronse por ‘Caleya Sésamu: el papel de la televisión na tresmisión interxeneracional de la llingua’ por “la solidez documental y la bona estructuración d'una obra qu'analiza les posibilidaes de l'animación infantil como instrumentu favorecedor de les llingües minoritaries, avanzando propuestes concretes nel ámbitu de la normalización social de la llingua asturiana”.

Nacíu n’A Estrada nel 1984, anque criáu n’Avilés, Barreiro ye un profesional del periodismu que trabayó como redautor n’Asturies.com y Les Notices, y collaboró en La Nueva España, ente otros medios. Espertu nel terrén televisivu, l’añu pasáu llevó’l VI Premiu d’Ensayu y Trabayos d’Investigación Fierro Botas con ‘L’espeyu onde miranos: televisiones de proximidá n’europa Occidental y procesos de recuperación identitaria’, obra espublizada por Trabe. El premiáu ye tamién l’autor del blogue ‘Cultura basura’.

Segundu fallu de los Premios Lliterarios 2014

El Premiu Máximo Fuertes Acevedo ye’l segundu de los Premios Lliterarios 2014 que se falló. El llunes conocióse que Carlos González Espina yera merecedor del VII Premiu María Xosefa Canellada de lliteratura infantil y xuvenil pola obra ‘Cápsules de tiempu’. Nos díes próximos van aconceyar los xuraos del XX Premiu Xuan María Acebal de poesía, del VI Premiu Alfonso Iglesias de cómic y del XXXV Premiu Xosefa Xovellanos de novela.