Ramón d’Andrés gana’l premiu Máximo Fuertes Acevedo d’ensayu n’asturianu cola obra 'Una ciencia ensin enfotu'

|
Ramón d’Andrés gana’l premiu Máximo Fuertes Acevedo d’ensayu n’asturianu cola obra 'Una ciencia ensin enfotu'

Los miembros del xuráu que falló’l premiu destacaron que’l trabayu de D’Andrés “ye un manual básicu p’abrir los güeyos de cualquiera, filólogu o non, sobre la ciencia y la non-ciencia que consumimos, asimilamos y creyemos al falar de llingües nel día a día”. El xuráu valoró tamién el trabayu por “la investigación y reflexón” que reflexa.

Nesta edición del Máximo Fuertes Acevedo, y baxo la presidencia del director xeneral de Política Llingüística, Antón García, el xuráu tuvo integráu poles filólogues y profesores Marta López y María Cueto, la escritora y tamién filóloga Beatriz Quintana, el filólogu Jorge Arturo Sierra y Xune Elipe, músicu, comunicador y ganador de la edición pasada del gallardón. Lourdes Álvarez, filóloga del serviciu de Planificación y Conocimientu de la Llingua Asturiana de la Dirección General de Política Llingüística, actuó como secretaria. El premiu ta dotáu con 6.000 euros.

Ramón d’Andrés (Madrid, 1959), ye profesor titular de Filoloxía Española y Asturiana en la Universidá d’Uviéu. La so trayectoria investigadora vínculase a delles temátiques rellacionadas col asturianu. Fue redactor  de les Normes Ortográfiques y del Diccionariu de la Llingua Asturiana, obra de l’Academia de la Llingua Asturiana, de la que ye miembru de númberu. 

Ente la obra tan estensa que publicó figuren títulos como Diccionariu temáticu de la Llingua asturiana (1991), Encuesta sociollingüística nuna parroquia asturiana (Deva-Xixón) (1993), Gramática práctica del asturiano (1997), Llingua y xuiciu (ganadora del Máximo Fuertes Acevedo en 1997),  Cuestiones d’asturianu normativu (2001-2003), Juicios sobre la lengua asturiana. Algunas cuestiones básicas acerca del debate lingüístico en Asturias (2002),  Gramática comparada de las lenguas ibéricas (2013) o Averamientu a la llingua asturiana (2019). También ye coautor, con Fernando Álvarez-Balbuena, Xosé Miguel Suárez y Miguel R. Monteavaro, de la obra Estudiu de la Transición Llingüística na zona Eo-Navia, Asturies (ETLEN).

Contador Estadistiques