Barbón llama a entamar unos ‘Pautos de Fruela’ “pola reconstrucción económica y social de la nuesa tierra”

El presidente Adrián Barbón celebró una videoconferencia informativa col grupu de trabayu de la Xunta Xeneral pal siguimientu y evaluación del coronavirus n’Asturies. Nella pidió a la oposición entamar “un gran alcuerdu pola reconstrucción económica y social de la nuesa tierra” que nomó ‘Pautos de Fruela’.

En plenu alderique sobre una llonxana reedición de los Pautos de la Moncloa, roblaos mientres la Transición nel 1977, el socialista apuntó ayeri que “quiero treslladar esta mesma propuesta a Asturies”. “Unos ‘Pautos de Fruela’ si me permitís la comparación”, siguió, en referencia al nome de la cai d’Uviéu na que ta asitiada la Xunta Xeneral, dedicada nel 1880 al monarca asturiana Fruela I, consideráu fundador de la ciudá nel 761.

“Les comunidaes autónomes vamos formar parte de los Pautos de la Moncloa, pidímoslo delles comunidaes autónomes, ente elles Asturies, y por eso quiero pidivos dende yá que me treslladéis les vueses propuestes y aportaciones pa estos pautos al oxetu de que na negociación que s’abra yo pueda recoyer el sentir de la mayor parte de los representantes públicos asturianos y tamién, por supuesto, del pueblu asturianu. Unos Pautos de la Moncloa que nun ye que sían posibles, ye que son absolutamente necesarios. Unos pautos que llueu tendremos que repetir n’Asturies nesos Pautos de Fruela”, reclamó Barbón.

“Esto nun va de partíos, esto ye muncho más fondu, va d’Asturies”, siguió’l presidente na so llamada a la xunidá. “Si en momentos como ésti nun somos quien a xunir esfuercios, ¿pa qué servimos los políticos?”, entrugóse al tiempu que reconoció errores y afirmó que “nun ta ganada la batalla al coronavirus”.

Aumentu de los positivos

La incorporación de los test rápidos por anticuerpos pa la detección de la COVID-19 ta llevando a un aumentu de los positivos nuevos n’Asturies y, como yera d’esperar, un cambiu na evolución de la curva que dificulta siguir los diferentes modelos matemáticos de predicción emplegaos hasta'l momentu. Ayeri rexistráronse 93 casos, pa poner el total en 2.051.

El númberu de persones n’UCI y planta medraron, con 2 (63) y 12 (383) pacientes más, de manera respeutiva, mentes qu’hebo que llamentar 7 finaos nuevos, polo que la cifra de muertes asciende a 156. Los curaos de la enfermá provocada pol coronavirus SARS-CoV-2 son 458 tres les 24 d’ayeri.

Na imaxe, Barbón atiende dende'l so despachu la intervención por videoconferencia de Marcelino Marcos, presidente de la Xunta Xeneral. Semeya obra d'Armando Álvarez.