La crisis pol coronavirus provoca un descensu del sofitu eleutoral a los dos partíos del Gobiernu

El Centru d’Investigaciones Sociolóxiques (CIS) espublizó esti miércoles l’avance de resultaos del barómetru d’abril, con encuestes feches mientres l’estáu d’alarma. La crisis sanitaria pol coronavirus provoca un descensu llixeru na estimación de votu al PSOE y a Xuníes Podemos, socios del Gobiernu estatal, y un aumentu al PP.

En concreto la recoyida de datos fíxose del 30 de marzu al 7 d’abril con 3.000 entrevistes. El PSOE perdería con respeutu al barómetru de marzu siete décimes n’estimación de votu en porcentaxe sobre’l votu válidu, al pasar d’un 31,9 a un 31,2.

Los sos socios del Gobiernu tamién baxaríen, nesti casu nueve décimes, d’un 12,9 a un 12, anque la formación parllamenta que rexistraría un mayor descensu sería VOX, que pasa d’un 14,8 a un 13 por cientu. El partíu más beneficiáu pola crisis sanitaria ye’l PP, anque sigue a muncha distancia del PSOE, con una estimación actual de votu de 21,1 por cientu cuando’l mes anterior algamó un 19,6.

Otra manera, un 58,9 por cientu de los encuestaos nesti barómetru del CIS afirma tar mui esmolecíu pola pandemia de COVID-19 y un 46,6 por cientu considera que con Pablo Casado al frente del Gobiernu la llucha contra’l coronavirus SARS-CoV-2 sería “práuticamente igual”. Un 42,3 por cientu asitia a esti virus como’l principal problema que tien anguaño l’Estáu nuna consulta en multirrespuesta que reflexa un total de 49,3 sumando les trés respuestes, siguíu de los problemes de calter económicu’ (39,1) y el paru (36).

Baxen los positivos nuevos

Los datos oficales últimos de COVID-19, correspondientes a les 20 hores d’ayeri, dexaron una baxada nel númberu de positivos nuevos. De los 93 casos del llunes pasamos a 45, siendo’l total de 2.096.

Tamién descendieron les persones ingresaes na UCI (3 pa quedar en 60) y en planta (12 pa quedar en 371), con 29 curaciones (457). Mentes, hai que llamentar 10 muertes p’algamar la cifra de 166 dende l’entamu del andanciu.

Na semeya, Pedro Sánchez y Pablo Iglesias, líderes del PSOE y Xuníes Podemos, de manera respeutiva, esta mañana nel Congresu na sesión de control al Gobiernu.