Asturies reparte 228.000 mázcares na vuelta al trabayu de los sectores non esenciales

Esti llunes los emplegaos de los sectores non esenciales que nun puedan teletrabayar tornaron a los sos puestos tres la entrada en vigor de la segunda prórroga del estáu d’alarma pola pandemia de COVID-19. N’Asturies tán repartiéndose 228.000 mázcares n’estaciones pa los que tengan qu’usar el tresporte públicu.

El xueves aprobóse nel Congresu’l preste a la segunda prórroga del estáu d’alarma –cola oposición única de VOX y CUP y l’asnteción d’ERC-Sobiranistes, Junts per Catalunya, EH Bildu y BNG–, que va ser de 15 díes, hasta’l 26 d’abril. Ésta va ser menos restrictiva que l’anterior, yá que torna a la situación primera, permitiendo l’asistencia al so puestu de trabayu a los emplegaos de los sectores que nun entraron na categoría d’esencial na primer estensión del estáu d’alarma.

Cola fin de tratar de protexer a los trabayadores, el Ministeriu de Sanidá repartió 10 millones de mázcares a les comunidaes autónomes pa la so entrega nes estaciones pal so usu nel tresporte públicu. A Asturies correspondieron-y 228.000 que, nos momentos de mayor movilidá, tán proporcionado a lo llargo de güei Policía Nacional, Guardia Civil, policíes llocales y voluntarios de Proteición Civil.

Aumentu de les muertes

Los datos sobre la evolución de la pandemia de COVID-19 dexaron estos díes un aumentu del númberu de finaos, que yá asciende a 149. Dende’l miércoles morrieron un total de 47 persones, la mayor parte en residencies, siendo’l día con más perdes el sábadu, con 12.

No que respeuta a los positivos nuevos la cifra medró col aumentu de casos nes residencies: el miércoles, 32; el xueves, 62; el vienres, 28; el sábadu, 65; y el domingu, 66. Asturies yá suma 1.958 casos de COVID-19.

Les cifres oficiales últimes, correspondientes a les 20 hores d’ayeri, apunten que na UCI hai anguaño 61 pacientes y en planta, 371. Un total de 434 curaron yá de la enfermedá causada pol coronavirus SARS-CoV-2.

Na imaxe, voluntarios de Proteición Civil a primer hora de la mañana na estación d'ALSA en Xixón pa proceder a la entrega de les mázcares. Semeya propiedá de la Delegación del Gobiernu estatal n'Asturies.