Detéctense 130 casos nuevos de COVID-19 el miércoles, con una positividá del 5,31

Siero torna al riesgu estremu, con zarru perimetral, depués de salir el 20 de febreru.

A falta de la espublización de los datos oficiales de la COVID-19, la Conseyería de Salú comunicó 130 contaxos ayeri –l'actualización suma dos positivu más que ponen el total en 132–. Son 14 menos que los detectaos el martes, anque la tasa de positividá diaria ye mayor, un 5,31 por cientu por un 4,54 del día anterior, al facese cuasi 1.000 pruebes de diagnósticu d'infeición activa menos, 3.143 por 4.031.

A 7 díes, el martes esti porcentaxe yera del 5,23 por cientu –ayeri xubió al 5,56 por cientu–. La Organización Mundial de la Salú (OMS) marca un 5 por cientu como cifra referencia a partir de la que s'empieza a perder el control de la pandemia.

Na xornada finaron trés muyeres de 87, 86 y 70 años. Dende qu'entamó l'andanciu perdieron la vida cola enfermedá causada pol coronavirus SARS-CoV-2 un total de 1.830 persones.

Hai hospitalizaos 217 pacientes con confirmación o sospecha de COVID-19, a los qu'hai que sumar 88 que tán na UCI. Son 6 y 1 más que'l martes, de manera respeutiva.

Cuatro conceyos n'alerta 4+

A Ḷḷena, Piloña y Cangues d'Onís, conceyos en riesgu estremu nesti momentu, súmase agora Siero, primeru que torna a esti nivel d'alerta depués de salir d'él. Tuviera enantes del 2 al 19 de febreru.

Ayeri incumplía per más de trés díes los indicadores que se tienen en cuenta pa conceyos de más de 30.000 habitantes, requisitu al que tamién se suma'l tar per 3 díes nel nivel 4 según el baremu del Ministeriu de Sanidá: 343 d'incidencia acumulada a 14 díes (máximo 325), 328 d'incidencia acumulada a 14 díes ente mayores de 65 años (máximo 195) y una trazabilidá del 73 por cientu (mínimo 75). Por esti motivu, la Conseyería de Salú decreta'l so zarru perimetral y les midíes del nivel d'alerta 4+, ente les que rescampla'l zarru d'interiores nos chigres y el pieslle de centros comerciales, per 14 díes, hasta'l 2 d'abril.

Pa consultar la situación de tolos llugares y les normes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

31 biltos activos

Asturies informó al Ministeriu de Sanidá de la esistencia de 31 biltos activos, 6 más qu'hai una selmana, con un total de 351 casos. 10 d'ellos detectáronse estos 7 díes últimos, comunica la conseyería.

Na semeya, La Pola Siero.