Asturies tien alcuerdu presupuestariu pela izquierda

El Conseyu Ciudadanu de Podemos dio’l preste al proyeutu presupuestariu del Gobiernu, que va salir alantre tamién col sofitu d’IX. D’esta forma Asturies va tener un presupuestu de 4.524 millones esti 2019 depués d’un añu coles cuentes prorrogaes.

Nel últimu presupuestu del mandatu, a seis meses de les eleiciones, FSA y Podemos llegaron a un alcuerdu inéditu. Años anteriores los socialistes tuvieron que prorrogar les cuentes o pautar col PP pa poder sacales alantre, como asocediera coles del 2017.

Agora, tres avanzar nes trés cuestiones que Podemos consideraba claves –llistes d’espera, mengua de tases universitaries y escuela de 0 a 3 años–, el Gobiernu de Javier Fernández va disponer d’un presupuestu de 4.524 de marcáu calter social. El 68 por cientu del mesmu van a Educación, Sanidá y polítiques sociales.

Alcuerdos principales

En cuestión de Sanidá, recuperaránse 301 places pa cubrir el desendolcu de la xornada de 35 hores y convocaránse 60 de médicos p’avanzar na mengua de les llistes d’espera. No que respeuta a les tases universitaries, con una demanda de Podemos de baxada superiores al 36 por cientu, éstes descenderán un 25 por cientu.

El puntu estrella de la negociación del añu pasáu, la pretensión de Podemos d’una rede d’escueles de 0 a 3 años pública, gratuita y universal, fina con un alcuerdu que nun llega a la demanda de la formación morada pero qu’aumenta la partida actual nun 34 por cientu. D’esta forma ésta amplíase hasta los 16,2 millones d’euros, tresformándose tamién como un creitu ampliable como’l salariu social.

Sí d’IX

Ramón Argüelles, coordinador xeneral d’IX, confirmara hores enantes que Podemos el sofitu de la so formación al presupuestu del Gobiernu por incluyir gran parte de les sos esixencies. Ente elles ta l’aumentu del impuestu d’actos xurídicos documentaos de les hipoteques, qu’han de pagar los bancos, del 1,2 por cientu actual al 1,5 por cientu, lo que supondría un aumentu de los ingresos en más de 3,5 millones d’euros.

Na imaxe, la conseyera de Facienda y Sector Públicu, entrega un usb col proyeutu presupuestariu a Pedro Sanjurjo, presidente de la Xunta Xeneral. Semeya obra d'Armando Álvarez.