“Diferencies importantes” na negociación presupuestaria ente Podemos y el Gobiernu

|
Enrique López Hernández y Javier Fernández presupuestos

Cuatro hores allargóse’l conceyu ente Podemos y el Gobiernu pa la negociación de los presupuestos del miércoles. A la salida, pasaes les 22 hores, la formación morada afirmó qu’esisten “diferencies importantes” nos temes que considera centrales: llistes d’espera, mengua de tases universitaries y escuela de 0 a 3 años.

“Consideramos que l’esfuerciu del Executivo deberá ser mayor pa evitar siguir prorrogando los presupuestos del PP”, esplicó Enrique López Hernández, voceru de Podemos. A pesar de les diferencies, asegura que “too ta abiertu y siguiremos avanzando y en contautu permanente col Gobiernu mientres los díes próximos”.

Pela mañana, Podemos anunciara que diba llevar a la reunión una llista con 60 midíes dividíes en diez bloques y que, según apunten, “suponen menos del 2,5 por cientu del total de les cuentes”, unos 100 millones. La mengua de les tases universitaries y la reducción de les llistes d’espera sanitaries son asuntos centrales pa la formación xunto con una rede d’escueles de 0 a 3 años pública, gratuita y universal.

Tamién con IX

Enantes el Gobiernu aconceyara con Izquierda Xunida (IX), que pautó colos socialistes elevar l’impuestu d’actos xurídicos documentaos de les hipoteques, qu’han de pagar los bancos, del 1,2 por cientu actual al 1,5 por cientu d’aprobase’l presupuestu. La coalición ve cercanu l’alcuerdu final a la espera de mayores avances nel apartáu municipal, cola intención d’algamar una mayor cooperación por parte del Executivu colos conceyos.

Na imaxe, López Hernández saluda al presidente Javier Fernández na primer de les dos reuniones celebraes hasta la fecha pa negociar los presupuestos. Semeya obra d'Armando Álvarez.

Contador Estadistiques