El presupuestu d'Emplegu, Industria y Turismu ye de 228 millones esti 2019

|
Isaac Pola

La conseyería va centrar esfuercios na dixitalización d'empreses, el sofitu a los autónomos y la contratación de paraos.

El responsable d'Emplegu, Industria y Turismu, Isaac Pola, compareció ayeri na Comisión de Facienda y Sector Públicu de la Xunta Xeneral pa informar sobre'l Proyeutu de Llei del Principado d'Asturies de Presupuestos Xenerales pal 2019 no que respueta al so departamentu. El presupuestu de la conseyería xube a 228.386.926 euros, un 0,17 por cientu más qu'el del proyeutu pa esti añu y un 13,4 por cientu percima del creitu dispuestu finalmente.

Los fondos destinaos al Institutu de Desenvolvimientu Económicu (Idepa) crecen un 18,4 por cientu, hasta los 30,7 millones. El principal oxetivu ye siguir favoreciendo la incorporación de nueves teunoloxíes nes empreses, poniendo en marcha'l Dixital Innovation Hub, un centru d'innovación que se va sofitar nes competencies diferenciales d'Asturies y va ser clave pa l'allugamientu de la comunidá nel movimientu global de la dixitalización.

Tamién se va habilitar una llinia d'ayudes específica con cuenta de que pymes y autónomos apuesten por teunoloxíes innovadores. Esta midida ta dotada con 1.250.000 euros y va sumase a les llinies d'I+D+i yá esistentes.

Sofitu a entamadores

Nel 2019 va ponese en marcha la Rede de Centros de Referencia d'Entamadores d'Asturies (rede Crea), que va permitir xunificar los servicios qu'empresten les distintes empreses públiques. Va reforciase tamién la formación de los téunicos, va diseñase un itinerariu d'acompañamientu común y va enllantase una plataforma de xestión que faiga posible l'intercambiu automáticu d'información y datos ente centros.

Tamién se va convocar una nueva ayuda, el cheque del emprendimientu, que va sustituyir al tique del autónomu y ameyorálu, yá que va permitir sofitar a persones que vivan nel estranxeru y retornen a Asturies con mires d'entamar o a aquelles que, tres un primer fracasu, aspiren a abrir un negociu nuevu. La cuantía de l'ayuda va xubir a 10.000 euros, 6.000 más que l'estintu tique del autónomu.

Refuerciu a la contratación

La partida del Sepepa auméntase un 3,7 por cientu pa reforciar les midíes que faciliten l'accesu de la mocedá al mercáu llaboral, fomentar la contratación, sobre manera de persones con especiales dificultaes, y empobinar a los paraos na busca d'un puestu de trabayu. Al sofitu a la contratación –tanto nel ámbitu local como empresarial– y la orientación profesional destínense 53,8 millones d'euros.

Destaquen les partíes pa conceyos (13,7 millones), pa empreses (14,2) y pa entidaes ensin ánimu d'arriquecimientu (10,4). Pela so parte, los centros especiales d'empléu van recibir 14,4 millones.

Tamién s'ameyoren les ayudes a la contratación de mocedá inscrita nel Sistema de Garantía Xuvenil per aciu'l financiamientu de contratos de formación y aprendizaxe –aquellos que lu combinen con una actividá llaboral retribuyida– que van contemplar, per primer vez, les contrataciones nes que la formación s’impartie nel sistema educativu, amás de la correspondiente a los certificaos de profesionalidá. Los planes mestos d'emplegu y formación, que beneficien sobre manera a paraos de llarga duración y nuevos ensin cualificación, van concentrar 13,3 millones, mentes que'l programa de formación profesional pal emplegu va cuntar con 39,6 millones, 7 más qu'anguaño.

Promoción turística y enerxía

La partida pa promocionar Asturies como destín turísticu y fomentar la competitividá del sector suma 10.006.430 euros. Nesti apartáu destaca la creación de dos nueves llínies d'ayudes, una d'elles alliniada coles mires de convertir el país en destín intelixente y ameyorar la sostenibilidá medioambiental y, la otra, col oxetivu de sofitar la execución de proyeutos innovadores.

El presupuestu destináu a la promoción d'enerxíes anovables y a les actuaciones de sofitu a la eficiencia enerxética y la meyora de les instalaciones llétriques antigües xube a 2.296.900 euros. Per otru llau, a la investigación, desenvolvimientu y innovación nel ámbitu mineru y a actuaciones de rehabilitación d'espacios degradaos dedíquense 1.400.289 euros.

Na imaxe, Pola nun Plenu na Xunta Xeneral celebráu en payares. Imaxe d'Armando Álvarez.

Contador Estadistiques