“Asturies ta más qu’asentada nel Interceltique”, asegura Sánchez Santianes

“Un ésitu”. Asina califica Iñaki Sánchez Santianes, responsable de la delegación asturiana nel Festival Interceltique de Lorient, el papel desendolcáu polos nuesos músicos, artistes y deportistes nel certame bretón, que l’añu que vien va tar dedicáu a Galicia.

“Asturies ta más qu’asentada nel Interceltique, con una representación de calidá y una bona respuesta de crítica y públicu”, destaca Sánchez Santianes depués de tornar de Breizh “pa garrar unos díes de vacaciones y en setiembre comenzar a preparar la edición del añu que vien”. Ésta, la cuarentena novena del festival celta más importante del mundu, va celebrase del 2 al 11 d’agostu, con Galicia como país principal diez años depués.

“Los grupos asturianos –les bandes de gaites Villaviciosa-El Gaitero y l’ayerana El Gumial y el candasín Grupu de Baille Tradicional San Félix– y les bandes de folk –José Manuel Tejedor y Luis Núñez y Los Folganzanes– fixeron un bon papel, con munchu públicu nes sos actuaciones, y quedaron mui contentos de la so participación nel festival”, añade, al tiempu que repasa dalgunos de los ésitos algamaos pola delegación. Ente ellos ta un trunfu nuevu nel Trophée Mac Crimmon qu’enfrenta a gaiteros asturianos y gallegos, que nesta ocasión llevó l’avilesín Javier Menéndez González; el segundu puestu d’El Gumial nel concursu de cuerpos de percusión; o l’actuación de Ramón Prada al órganu, interpretando parte de la so ‘Noche celta’, “que sorprendió a toos”.

Llucha, 'Asturianaes' y chigre

La gran novedá esti añu de la delegación asturiana foi la presencia de cinco deportistes de la Federación Asturiana de Llucha que participaron nun campeonatu internacional de gouren, llucha tradicional bretona. N’An Oriant tamién tuvieron la oportunidá de conocer otres modalidaes céltiques y de dar a conocer la llucha baltu.

Fuera de la delegación asturiana tamién tuvo una perbona crítica l’espectáculu ‘Asturianaes’ de los bretones Bagad Roñsed-Mor y los asturianos Clara Diez Márquez, Verónica Fueyo y Caldo y Os Rabizos, cola que la formación de la nación celta quixo averase a la nuesa cultura. El deséu de los sos protagonistes ye’l de traelu l’añu qu’entra a Asturies, anque la so representación equí nun ye segura pal costu altu de desplazar a tantos músicos.

Lo que yá se sabía que yera un ésitu aseguráu yera’l pabellón d’Asturies na Quai des Pays Celtes, un chigre asturianu del que s’encargó Chus Adrián Rodríguez Álvarez depués de que l’añu anterior Asturies quedara ensin él tres ser el primeru y convertise nun referente mientres casi 20 años. Melandru punxo la nota musical como grupu residente, pero formaciones de dellos países fixeron baillar a los presentes, que disfrutaron de la sidra y la gastronomía asturiana, asina como acceder a información turística.

750.000 espectadores

No que respeuta a esta edición del Festival Interceltique de Lorient, dirixíu un añu más pol asturianu Lisardo Lombardía, les cifres manexaes pola organización son más que satisfactories. Un total de 750.000 persones disfrutaron del certame, con entraes escosaes pa munchos espectáculos y una asistencia masiva a la Gran Parade des Nations Celtes, el desfile del certame, a lo que tamién ayudó’l bon tiempu.

Asturies va tornar a tar presente nel 2019 un añu más nun festival nacíu nel 1971 que s’avera a les sos cincuenta ediciones. “Vamos trabayar na mesma llinia pa llevar lo más relevante y novedoso que se ta faciendo n’Asturies” a Breizh, confirma Sánchez Santianes.

Na semeya, representación asturiana (Villaviciosa-El Gaitero, El Gumial y San Félix) nuna de les nes nueches máxiques, anguaño baxo'l nome de Nuit Interceltique Bretagne, que se celebren nel campu de fútbol llocal.