“Aportamos a Lorient cola intención de facer un bon papel nel Interceltique un añu más”, señala Santianes

|
Grupu de Baille Tradicional San Félix

La delegación asturiana, con Iñaki Sánchez Santianes al frente, yá ta en Breizh pa representar al país nel XLVIII Festival Interceltique de Lorient, dedicáu esti añu a Cymru. “Aportamos cola intención de facer un bon papel nel Interceltique un añu más”, destaca.

Los alredor de cien persones que conformen la delegación asturiana yá disfruten de les sos primeres hores nel festival celta más importante del mundu. Dos bandes de gaites, la Villaviciosa-El Gaitero y l’ayerana El Gumial, y el candasín Grupu de Baille Tradicional San Félix conformen la representación asturiana na Gran Parade des Nations Celtes y nes nueches máxiques, anguaño nomaes Nuit Interceltique Bretagne, un grupu a los que se van dir sumando los intérpretes Ramón Prada, José Manuel Tejedor, y Luis Núñez y Los Folganzanes, amás de Melandru, grupu residente del pabellón asturianu instaláu n’An Oriant baxo iniciativa de Chus Adrián Rodríguez Álvarez.

“Queremos mostrar la cultura del país y llevamos una bona representación”, esplica Santianes, convencíu del bon nivel de tolos músicos y baillarines desplazaos hasta Breizh. La primer oportunidá p’amosalo van tenela mañana los cuatro gaiteros que participen, dende les 14.30 hores nel Palais des Congrès, nel XXXIII Trophée Mac Crimmon: Fernando Vázquez Cárcaba (Lieres), Javier Menéndez González (Avilés), Diego Lobo (Morea) y l’actual campeón, Jaime Álvarez Fernández (La Fresneda).

De toos ellos, namái Lobo ye debutante, lo que permite pensar en qu’Asturies pueda tornar a ganar a Galicia nesta competición que domina dende’l 2013 nel que los 8 participantes han d’interpretar pieces bretones y de dambos países. “Tenemos espeutatives de victoria. Esperemos que la suerte acompañe”, apunta Santianes.

Enantes, a les 10 hores nel mesmu llugar, Jesús Fernández González, ganador del Mac Crimmon del 2013 y del 2016, va abrir la representación asturiana nel Interceltique con una clase maestra de gaita xunto col gallego Pepe Vaamonde.

Decenes de miles de persones

De nueche va tener llugar la pimer Nuit Interceltique Bretagne nel stade de Moustoir, espectáculu que va repetise’l domingu, el martes, el miércoles y el xueves. Yá pela mañana, va celebrase l’actu más importante del festival, con salida del propiu campu del Lorient a les 10 hores, la Gran Parade des Nations Celtes, na que desfilen toles agrupaciones participantes y qu’axunta a decenes de miles de persones peles casi d’An Oriant.

Nel Espace Marine van actuar tanto San Félix como Villaviciosa-El Gaiteru y El Gumial dientro’l ciclu ‘Musiques et danses des Pays Celtes’, siempre a les 14.30 hores. El llunes van baillar los candasinos xunto colos escoceses Strathallan School Pipe Banda y Keltika Dances, y los irlandeses New Ross & Distric Pipe Band; el miércoles los ayeranos con los bretones Bagad de Lann Bihoué, los galeses Côr Meibion Pendyrus y córnicos Kekezza; y el xueves los maliayos colos irlandeses Lisnamulligan Pipe Band, los escoceses Ullapool & District Pipe Band y los gallegos Grupo de Baile Asociación Cultural Saiñas.

Conciertos en dellos espacios

No que se refier a les grupos folk asturianos, l’encargáu d’abril la representación del país va ser José Manuel Tejedor, que va llevar los cantares del so primer discu en solitariu, ‘Miraes’, al Palais des Congrès y al Théâtre de Lorient. La primer actuación va ser el llunes a les 21.30 hores una ‘Soirée Folk’ xunto colos escoceses Gnoss, y la segunda nel Théâtre de Lorient al día siguiente a les 21 hores, nesti casu colos bretones Jacky Molard Quartet.

El martes tamién va tocar Luis Ñúñez y Los Folganzanes, a les 21 hores nel Palais de Congrès xunto colos galeses VRï & Gwilym Bowen Rhys. Los ganadores del Premiu al Meyor Cantar con ‘La ñeve y la esmeralda’ van repetir el xueves, a les 22 hores, nel conciertu de baldre ‘La Bretagne Invite’ con dos formaciones llocales, Erwan Moal et Soïg Siberíl y Trio Roblin Evain Badeau.

Mentes, Ramón Prada va llevar al órganu un poco de la so ‘Noche Celta’ el miércoles a les 21.30 hores na ilesia Saint-Louis dientro del ciclu ‘Musiques à l’Eglise’. Completa la delegación asturiana l’artista Mario M. Martínez, que va participar na Euro Celtic Arte que tien como sede l'Hôtel Gabriel, amás d’una amuesa de llucha baltu con deportistes de la Federación Asturiana de Llucha, que van aportar a An Oriant el miércoles.

Recuperación del pabellón d’Asturies

“L’Interceltique ye’l mayor escaparate que pue tener Asturies de cara a los países del Arcu Atlánticu, el festival más potente del mundu d’esti calter. Somos un país pequeñu, con un potencial mui grande, que tenemos muncho qu’ufrir nesti escaparate”, aseguró a Asturies.com Sánchez Santianes depués de repasar l’alineación de luxu que viaxa a Breizh. “Ye mui importante tar equí pa poder amosar la nuesa cultura a los países del Arcu Atlánticu, non sólo no musical sinón tamién no gastronómico o turístico, y tamién conocer lo que se fai n’otros llugares y deprender idees nueves”, añadió.

A ello, amás de l’amplia representación musical que va tar presente nel festival bretón, va ayudar la presencia, depués d’un añu d’ausencia, del pabellón d’Asturies. La iniciativa privada de Rodríguez Álvarez va permitir que la sidra torne a correr per An Oriant mientres el festival pa disfrute de bretones y los munchos visitantes de toles naciones celtes al certame, ente ellos un numberosu grupu d’asturianos.

Melandru, grupu de rock esperimental en llingua asturiana, va ser la banda residente del pabellón, que va contar con una variada programación musical de 17 hores al pieslle. Amás, les persones que s’averen al mesmu van poder disfrutar de productos típicos asturianos y recoyer información turística.

“El pabellón ta mui guapu”, rellata’l responsable de la delegación asturiana, que desea “que’l bon tiempu siga acompañando pa que la xente que s’avere a él pueda disfrutar de la sidra y tolo qu’ufre’l”.

‘Asturianaes’

Fuera de la delegación asturiana, tamién va haber un güecu pa la música del país dientro de la programación del festival. Trátase d’una collaboración ente los bretones Locoal Mendon avec le Bagad Roñsed-Mor y Clara Diez Márquez, Verónica Fueyo y Caldo y Os Rabizos col nome ‘Asturianaes’, el vienres a les 21 hores nel Théâtre de Lorient.

Otra manera, ente los conciertos más nomaos d’esta edición destaca’l de Manic Street Preachers, amás de los de Yann Tiersen Solo, Elephant Sessions, Daori Farell Trio y Gilles Servat, éstos dos últimos con entraes escosaes.

Na semeya, el Grupu de Baille Tradicional San Félix momentos enantes de partir de Candás rumbu a An Oriant.

Contador Estadistiques