Salú comunica 518 casos, con una tasa de positividá del 7,72 por cientu

Fixéronse 6.708 pruebes PCR esti martes.

La Conseyería de Salú comunicó 518 positivos de COVID-19 diagnosticaos ayeri, la tercer cifra más alta de tola pandemia y 223 más que'l llunes. Sicasí, esti aumentu tan marcáu esplícase pola mayor cantidá de pruebes realizaes, superando per primer vegada les 6.000, yá que'l día anterior prauticáronse 4.361.

La tasa de positividá, poro, xubió d'un 6,7 por cientu a un 7,72. El domingu fora del 9,96, mentes que'l tope hasta la fecha diose'l xueves con un 10,16.

Na xornada hai que llamentar 18 muertes: diez muyeres de 97, 95, 93, 92, 91, 87, 86, 82, 69 y 66 años y ocho homes de 90, 90, 88, 87, 80, 74, 74 y 64, de los que nueve residíen en centros de mayores. Dende l'entamu de l'andanciu finaron con COVID-19 un total de 622 persones, anque les cifres oficiales correspondientes ayeri sumen 13 víctimes más non contabilizaes en díes anteriores que ponen el total de la serie en 635.

26 biltos en residencies

Ente'l 3 y el 9 de payares rexistráronse 26 biltos en residencies, 10 más qu'hai una selmana. Contabilizáronse 301 casos nuevos, ente internos y trabayadores, polos 376 del periodu anterior.

Les autoridaes sanitaries intervienen cuando se detecta un primer contaxu, anque se cuenten como brotos cuando hai al menos trés. Nesi sen, nesi periodu confirmaróse casos n'otros 57 centros residenciales.

934 persones ingresaes

Nestos momentos hai hospitalizaos 806 pacientes con confirmación o sospecha de COVID, 11 más que'l llunes. Amás, na UCI permanecen 128 persones, una menos qu'ayeri.