Baxen los casos nuevos de COVID-19 esti llunes

Detectáronse 1.648 contaxos nuna xornada na que finaron dos muyeres de 97 y 93 años.

Per quintu día baxen los positivos confirmaos pola Conseyería de Salú n'Asturies. Depués de que'l miércoles se rexistrara la cifra más alta de tol andanciu, 2.301 casos, los contaxos empezaron a descender: 2.055 el xueves, 2.029 el vienres, 1.965 el sábadu, 1.918 el domingu y 1.648 ayeri.

Sí xubió la hospitalización, pasando de 301 a 332 ingresaos. En planta hai 282 pacientes, 33 más que'l domingu, y 50 na UCI, 2 menos.

El total de finaos nel andanciu aumenta a 2.178 llueu de les dos muertes rexistraes na xornada.

Na semeya, puntu de vacunación nuevu en La Pola Siero, nel aparcamientu del Mercáu Nacional de Ganáu.