Asturies rexistra un únicu positivu por PCR nuna xornada con 2.306 muestres procesaes

La datos últimos de COVID-19 n’Asturies, correspondientes al llunes a les 20 hores, dexaron la cifra más baxa de positivos del estáu d’alarma, un total de 11, de los que 1 namái ye por PCR. Nesta xornada procesáronse 2.306 muestres por esti test, lo que da más valor entá a estes bonos rexistros que confirmen el final de la curva.

Los tests por PCR son los más fiables, pero tamién los afayadizos pa valorar la evolución del andanciu, yá que deteuten l’ARN del coronavirus SARS-CoV-2, mentes los nomaos ‘rápidos’ dan positivos por anticuerpos, apaeciendo na estadística aquelles persones que yá pasaron la enfermedá y nun-yos fixeron la prueba nel so momentu. Nes cifres daes ayeri pola Conseyería de Salú diose un únicu casu ente los 2.306 muestres que se procesaron por PCR, mentes que los d’anticuerpos foron 10 ente 1.099 pruebes feches; esto ye, la cifra más baxa dende’l 16 de marzu, cuando’l Ministeriu de Sanidá empezó a centralizar los datos, y la más alta de tests realizaos hasta agora (3.405).

Les pruebes rápides distorsionaron les estadístiques desque comenzaron a contabilizase’l 12 d’abril, pero dende’l sábadu sepártense nes informaciones diaries. Repasando y dixebrando nes xornaes anteriores los positivos por PCR y anticuerpos, vemos que la curva que toma como referencia los modelos d'epidemies de Verhulst y Gompertz, espublizaes en dos ocasiones n’Asturies.com, continúa siguiendo’l primeru, que predecía la fin de casos nuevos pa estos díes.

21 curaciones

La nota negativa d’ayeri foron les 8 persones finaes, que ponen el total de muertes por COVID-19 en 261. Mentes, hebo 21 curaciones, polo que 780 persones yá pasaron la enfermedá.

El númberu de pacientes na UCI baxa a 43 y en planta a 246, 2 y 5 menos qu’ayeri, de manera respeutiva.