Salú principia a informar de manera separtada los positivos por test por PCR y por anticuerpos

Sigue'l descensu de les cifres de pacientes ingresaos na UCI y en planta por COVID-19.

La Conseyería de Salú modificó esta fin de selmana'l mou de dar los datos de la pandemia de la enfermedá causada pol coronavirus SARS-CoV-2. El sábadu principió a separtar los positivos por PCR de los que se rexistren por test d'anticuerpos, lo que dexa ver una meyor semeya de la situación actual del andanciu.

Nos dos díes últimos hebo 16 casos nuevos deteutaos por PCR, 11 el sábadu y 5 el domingu, prueba qu'identifica l'ARN del SARS-Cov-2. Mentes, por tests rápidos foron 115 (44 y 71), nos que dan positivu aquellos que xeneraron anticuerpos, tamién los que yá pasaron la enfermedá.

74 curaciones y 22 muertes

Del vienres al domingu descendió en 3 el númberu de persones na UCI (de 48 a 45) y en 18 les ingresaes en planta (de 269 a 251). Hai una selmana había 56 y 358 hospitalizaos, de manera respeutiva.

No que respeuta a les curaciones, el total asciende a 759 tres rexistrar 74 esta fin de selmana. Por contra hebo que llamentar 22 muertes que dexen 253 finaos por COVID-19.