Asturies rexistra 14 positivos, la cifra más alta dende'l 6 de mayu

Cuatro d'ellos tán venceyaos col biltu de Málaga y otru col de La Corredoria.

La tresmisión del coronavirus SARS-CoV-2 n'Asturies ta empezando a ser esmoleciente. El país rexistró ayeri 14 casos de COVID-19, la cantidá más alta dende'l 6 de mayu, cuando hebo 16 positivos por PCR, cola esceición única del biltu nuna residencia de Xixón a últimos de mayu que dexó 18 contaxos el día 29 d'esi mes.

El Serviciu de Vixilancia Epidemiolóxica notificó que cuatro d'ellos tán venceyaos col biltu ente un grupu de 12 estudiantes que viaxaron a Málaga, polo que yá son 8 los menores contaxaos. Mentes, el de la cervecería Urban’s del barriu uvieín de La Corredoria suma un positivu, el sétimu, un home que ye contautu estrechu de los primeros afeutaos.

Hasta'l momentu fixéronse al rodiu de 1.300 pruebes PCR entre familiares y vecería d'esti chigre dende'l sábadu, cuando se notificó'l brotu.

Importaos d'Andalucía y Catalunya

A estos 5 positivos hai que sumar otres 9 más. D'ellos 4 son importaos: trés miembros d'una familia tres una estancia n'Huelva y un home procedente de Barcelona.

A éstos hai que sumar dos afeutaos más, contautos estrechos de contaxaos n'Aragón y Bizkaia. Por último, tán estudiándose otros 3 posistivos, un home y dos muyeres, madre y hija, ensin venceyu epidemiolóxicu.

Los 14 contaxaos, que faen aumentar a 49 la cifra d'afeutaos n'Asturies dende la fin del estáu d'alarma, tán aisllaos nos sos domicilios con síntomes leves.

Na semeya, cervecería Urban's, orixe del segundu biltu confirmáu nel país tres el del occidente.