Biltu nuevu n'Asturies venceyáu al casu procedente de Málaga

Una persona que taba ingresada na UCI dende marzu perdió finalmente la vida.

Ismael Huerta, xefe del Serviciu de Vixilancia Epedemiolóxica, confirmó trés positivos de COVID-19 venceyaos col casu del mozu contaxáu en Málaga, polo qu'Asturies declara un biltu nuevu, el terceru dende'l final del estáu d'alarma. Son compañeros d'un grupu de 12 estudiantes menores d'edá que pasaben un viaxe nesta provincia andaluza, rapazos que dalgunos yá tán n'Asturies, otros de camín y el restu nel llugar.

D'esta forma asciende a 35 el númberu d'afeutaos n'Asturies por coronavirus SARS-CoV-2 nestes selmanes últimes, 2.470 dende l'entamu del andanciu. Éstos últimos tienen toos síntomes leves o son asintomáticos, polo que nun conllevaron ingresos nuevos.

Asina, anguaño nel país hai 41 casos activos y dos biltos, el de la cervecería de La Corredoria y el venceyáu con Málaga, yá que'l primeru, el d'occidente, quedó controláu con namái 3 positivos. Nestos momentos, según confirmó Huerta, tán en siguimientu ente 120 y 130 persones por ser contautos estrechos de los 35 contaxaos, toos en cuarentena.

La muerte númberu 340

Depués de 21 díes ensin muertes con COVID-19 nel país, ayeri hebo que llamentar una, la númberu 340. Trátase d'una persona que taba ingresada na UCI dende marzu y que nun pudo superar la enfermerdá.