Asturies quier facer un frente común con Aragón y Castilla y Lleón pa defender el carbón

Javier Fernández va aconceyar en febreru colos presidentes d’Aragón y de Castilla y Lleón en busca d’alcuerdu contra’l zarru de les térmiques y pola supervivencia de la minería. El conseyeru Isaac Pola va viaxar Bruxeles a finales d'esi mesmu mes pa participar nun alcuentru con otros 40 territorios mineros de la XE.

La reunión del presidente del país xunto col tamién socialista Javier Lambán y el popular Juan Vicente Herrera, dirixentes d’Aragón y Castiella y Lleón, de manera respeutiva, vien pol fechu de que los trés territorios comparten criterios básicos respeuto a la transición enerxética y la minería, polo que la intención ye acordar un plantegamientu conxuntu pa treslladalu al Gobiernu estatal y a les instancies de la Xunión Europea (XE). Asturies considera que’l 2018 va ser un año clave pa diseñar dichu proceso de transición enerxética nel Estáu y entiende que la progresiva reducción d’emisiones de carbonu, rellacionaes col calentamientu global, nun ha de facese a priesa y ensin tener en cuenta les consecuencies que conllevaría un zarru precipitáu de les térmiques.

Nesi sen, Asturies y Castiella y Lleón tán amenazaes pol pieslle previstu por Iberdrola de les térmiques de Lada –con 90 puestos de trabayu, a los qu’hai que sumar los indireutos, la so repercusión nel tráficu d’El Musel y el previsible aumentu del costu de la enerxía– y de Velilla del Río Carrión, de manera respeutiva, mentes qu’Aragón opónse a les previsiones d’Endesa de finar cola actividá de la d’Andorra. A esti asuntu hai que sumar qu’esti 2018 va ser tamién decisivu pa les esplotaciones mineres, yá que la Decisión 2010/787 del Conseyu Européu afita que’l 31 d’avientu han de tar pesllaes toles esplotaciones deficitaries, categoría na qu’entra la empresa pública Hunosa, con 1.300 emplegaos.

Amás, según apunten dende’l Gobiernu, Bruxeles impón otra condición que dificulta la supervivencia del sector: les empreses rentables tán obligaes a devolver les ayudas que recibieren. Poro, pa evitar qu’esta decisión lleve al zarru a les compañías que puedan siguir cola so actividá, l’Executivu reclamó al Ministeriu d’Enerxía, Turismu y Axenda Dixital que solicite más flexibilidá a les autoridaes comunitaries a la hora de proceder al reintegru de los fondos.

Alcuentru en Bélxica

Amás d’esta reunión de presidentes y la decisión de caltener contautos sobre esti asuntu con sindicatos, empreses, conceyos de les rexones mineres y fuercies polítiques, el conseyeru d’Emplegu, Industria y Turismo va asistir a Bruxeles los díes 26 y 27 de febreru nun alcuentru nel que participen otros 40 territorios mineros de 12 estaos. Toos ellos formen la nomada Plataforma de les Rexones Mineres en Transición, creada’l mes pasáu en Strossburi/Strasbourg.

Pola va participar nos conceyos de los dos grupos creaos: ‘Economía postcarbón y tresformación estructural’ y ‘Ecoinnovación y teunoloxíes de carbón avanzaes’. La postura que defende Asturies ye una transición hacia lo que se fai llamar enerxía llimpia, qu’ha de facese “de manera progresiva, equilibrada, non traumática y de mou que favoreza la innovación”.

Na imaxe, Fernández saluda a Herrera mientres la cume de presidentes d'Asturies, Castilla y Lleón, y Galicia, celebráu n'Uviéu'l mes pasáu. Semeya obra d'Armando Álvarez.