"Pa que la transición enerxética sía xusta necesítase tiempu", afirma Javier Fernández

|
Juan Vicente Herrera, Javier Fernández, Teresa Ribera y Javier Lambán

El presidente d'Asturies, Javier Fernández, desplazóse a Madrid pa celebrar un conceyu xunto con Teresa Ribera y los dirixentes de Castilla y Lleón, y Aragón. Aseguró que la ministra "foi receptiva" a les demandes de les trés comunidaes autónomes xuníes na defensa del carbón y na esixencia d'una transición enerxética xusta.

A la salida del conceyu Javier Fernández apuntó que "la idea que tresmitimos" a la responsable del Ministeriu pa la Transición Ecolóxica foi "que les rexones mineres d'España nun somos l'aldea gala. Sabemos qu'hai una realidá nueva que tien que llegar y qu'hai que construyir, y pensamos qu'esa realidá nueva nun se pue realizar colapsando d'inmediato la qu'esiste. Pa que la transición sía efeutivamente xusta necesítase tiempu, articular adecuadamente la continuidá de determinaes actividaes", como la minería del carbón o les centrales térmiques, "nel medio y llargu plazu".

Según espresó, Ribera "foi receptiva" a les propuestes daes tanto por Fernández como pol tamién socialista Javier Lambán, presidente d'Aragón, y el popular Juan Vicente Herrera, de Castilla y Lleón. "Si se cumplen les intenciones de dalgunes empreses llétriques de nun culminar determinaes inversiones y pesllar los sos subgrupos de xeneración a 30 de xunu de 2020, dificilmente vamos poder falar d'una transición xusta", añadió.

Yá nel tema particular de la industria asturiana, "lletrointensiva", treslladó-y a la ministra la necesidá "d'una fórmula estable de preciu" pa evitar el peligru de les desllocalizaciones. Asina, punxo a la ministra exemplos de mecanismos d'ayudes en funcionamientu en Francia y Alemaña pa dar estabilidá a los precios.

Na imaxe, Fernández saluda a Ribera énte Herrera, Lambán y el secretariu d'Estáu d'Enerxía, José Domínguez Abascal. Semeya obra d'Armando Álvarez.

Contador Estadistiques