Asturies va solicitar qu’Os Ozcos y los conceyos de los ‘Valles del Osu’ pasen a la fase 2 de manera direuta

El presidente del Gobiernu, Adrián Barbón, anunció na Xunta Xeneral que va pidir al Executivu estatal qu’Os Ozcos y los conceyos de los 'Valles del Osu' puedan pasar de manera direuta a la fase 2 del plan de desescalada, saltándose la primera, énte l’ausencia de casos de COVID-19. Asturies va entrar el llunes na fase 1.

Los conceyos beneficiaos seríen Vilanova d’Ozcos, Santalla d’Ozcos y Samartín d’Ozcos, amás de Proaza, Teberga y Santu Adrianu, pendiente de confirmar el casu de Quirós, l’únicu de los que conformen el nomáu ‘Valles del Osu’ que rexistró dalgún casu de COVID-19. “Tán nuna fase epidemiolóxica diferente”, esplicó’l presidente sobre estes dos rexones.

Queda por saber tamién qué pasará colos conceyos que llenden con estes zones que tampoco rexistraron positivos pola enfermedá, casu de Taramundi o Tameza, de manera respeutiva, ente otros. El restu d’Asturies pasará’l llunes a la fase 1, siguendo’l calendariu previstu.

La fase 2, o intermedia, rebaxa les restricciones a la población con respeuto a la fase 1. Asina permite la pesca deportiva o’l desplazamientu a la segunda residencia, siempre que sía a los conceyos que tean na mesma fase; y los chigres van poder abrir los sos llocales con midíes de prevención amás de les terraces, y los cines y teatros a un 30 por cientu d’aforu.