Asturies desciende a nivel baxu por COVID-19

|
Gráficu porcentaxe d'ocupación hospitalaria 29 de mayu

Torna a la mesma situación na que taba hasta'l 10 d'abril, tiempu nel que llegó hasta nivel altu.

Más de mes y mediu depués, Asturies vuelve a nivel baxu por COVID-19. La tasa d'ocupación hospitalaria cada 100.000 habitantes yera l'indicador que presentaba peores datos y que llevó al país a xubir dos niveles al algamar los 40,81 casos cada 100.000 habitantes.

Agora ta en 16,308, anque finalmente'l que retrasó la baxada foi'l porcentaxe d'ocupación hospitalaria, que nun pasó a nivel baxu hasta'l xueves. Foi al descender del 5 por cientu y agora, cola actualización de los datos del domingu, momentu nel que se ponen al día los niveles d'alerta xunto colos miércoles, ta nun 4,75 por cientu.

Tamién les hospitalizaciones

El númberu d'hospitalizaos quedó en 165, lo que supón un descensu de 49 con respeuto a hai una selmana, cuando había 214, toos ellos en planta, onde tán ingresaos 155, y 10 siguen na UCI. Nestos siete díes finaron 11 persones cola enfermedá causada pol coronavirus SARS-COV-2, que ponen el total del andanciu en 2.833 depués d'una actualización.

Na imaxe, gráficu del Observatoriu de Salú n'Asturies del porcentaxe d'ocupación hospitalaria con COVID-19 a fecha del 29 de mayu.

Contador Estadistiques