Asturies baxa a nivel mediu d'alerta por COVID-19

La cifra d'hospitalizaos descendió a 275 pacientes, de los que 263 tán en planta.

La situación epidemiolóxica n'Asturies entama a presentar meyores cifres. De fechu, el país pasó a tar el miércoles pasáu n'alerta media por COVID-19 depués de cuasi un mes n'alta.

El domingu 17 d'abril foi cuando ún de los seis indicadores de los servicios asistenciales, la tasa d'ocupación hospitalaria cada 100.000 habitantes, pasaba a tar en nivel altu. Naquel momentu yera de 32,91 casos, marcándose'l tope nesti periodu'l día 26 con 40,81, cifra que na actualización última, el domingu, quedó en 27,18.

Nestos momentos tán en planta 263 hospitalizaos, a los qu'hai que sumar 12 ingresaos na UCI, un total de 275. Cuando s'entró n'alerta alta había 333 (325 y 8, de manera respeutiva), algamándose los 414 (405 y 9) dichu día 26, xornada na que tuvo en riesgu mui altu xunto col 25.

Otra manera, la selmana pasada finaron 31 persones con edaes comprendíes ente los 54 y 94 años. Dende l'entamu del andanciu morrieron cola enfermedá causada pol coronavirus SARS-CoV-2 un total de 2.798 ciudadanos y ciudadanes.

Na imaxe, gráficu del Observatoriu de Salú n'Asturies de la tasa d'ocupación hospitalaria cada 100.000 habitantes con COVID-19 a fecha del 15 de mayu.