Asturies confírmase como’l territoriu menos taurín

|
Festexu popular con toros n'Alfara de Carles

Nel 2017 entamáronse en tol Estáu 17.920 festexos populares que tuvieron toros como protagonistes. D’ellos nengún tuvo sede n'Asturies, únicu territoriu xunto con Canarias –onde tán prohibíos dende’l 1991– nel qu’esti tipu de celebración nun tien raigón.

A pesar de lo que se pue pensar, datos del Ministeriu de Cultura afiten que los festexos populares con toros tán viviendo un aumentu nos años últimos. Si nel 2011 hebo en tol Estáu 14.262, esta cifra medró hasta los 15.848 nel 2014 y algamó los 17.920 nel 2017.

La Comunitat Valenciana foi onde más crecieron esti tipu d’eventos ente 2011 y 2017 al rexistrar 3.645 más pa llegar a los 9.715, confirmándose asina como’l territoriu con más celebraciones d’esta mena. Castilla y Lleón, con 1.930, y Navarra, con 1.605, son les siguientes nesta llista.

Asturies y Canarias, onde la so llei de proteición de los animales aprobada nel 1991 prohibe tanto estos festexos como les corríes de toros, son los únicos llugares non taurinos del Estáu. Baleares, que nel 2014 tampoco rexistraba nenguna celebración, nel 2017 entamó una.

Castilla-La Mancha, ún de les punteres con 1.253 fiestes; Extremadura (561); Galicia (1); Comunidad de Madrid (85); Murcia (64); Euskadi (148); y La Rioja (322) vieron amenorgaos dende’l 2011 estos eventos taurinos. La ciudá autónoma de Melilla caltién la so única celebración, mentes que Ceuta nun tien.

Na imaxe, correbou als carrers na población catalana d'Alfara de Carles. Semeya obra de Xavier Vázquez.

Contador Estadistiques